“Фруто НяНя”  жүүс  муудсан  байсан,  хүүхдийн  кашнаас хорхой гарсан, чанарын шаардлага хангахгүй байгаа гэх мэдээлэл цацагдсан нь багагүй асуудал үүсгээд байгаа. Тэгвэл холбогдох байгууллагуудаас ийм зүйл болоогүй гэдгийг баталж байгааг бид мэдээлсэн.  Тодруулбал, хэрэглэгчдээс   “Фруто НяНя”-гийн чанартай холбоотой асуудлаар гомдол ирээгүй. Харин ч уг бүтээгдэхүүнийг оруулж ирдэг  ““Бимекс Холдинг”-оос өөрсдийн хүсэлтээр шалгалт оруулж, бүтээгдэхүүнүүддээ шилжилгээ хийлгэсэн. Уг шалгалтаар ямар ч зөрчил илрээгүй гэдгийг албаныхан онцолсон байна.

Тэгвэл энэхүү мэдээлэл хаанаас цацагдсан талаар ““Бимекс Холдинг”-оос тодруулахад “Манай бизнесийн нэр хүндэд халдах зорилгоор хуурамч аккаунт үүсгэж худал мэдээлэл тараасан байсан. Бид үүнийг шалгуулахаар цагдаагийн байгууллагад гомдол гаргаад байгаа” гэв.

Харин энэ талаар ЦЕГ-ын хэвлэл мэдээллийн төвийн ажилтан Ё.Лхагвасүрэнгээс тодрууллаа.

-“Бимекс Холдинг”-гийн зүгээр санаатайгаар өөрсдийнх нь бизнесийн нэр хүндэд халдсан гэдэг гомдлыг цагдаагийн байгууллагад өгөөд байгаа гэсэн. Гомдлыг хаана шалгаж байгаа вэ?
-Уг компанийн зүгээс гомдол гаргасан нь үнэн.  Одоогоор харьяалалын дагуу Баянзүрх дүүргийн цагдаагийн хоёрдугаар хэлтэст шалгаж байгаа. Тухайн мэдээллийг хэн  гэгч ямар зорилготой тараасан зэргийг шалгаж байна. Будсын нэр хүндэд халдаж, бизнесийн үйл ажиллагаанд нь сөргөөр нөлөөлсөн үү гэдгийг мөрдөн байцаалтаар тогтооно.  Шалгалтын ажиллагаа үргэлжилж байна.

-Нэр хүндэд нь халдаж, бизнест нь нөлөөлөхийг завдсан гэдэг нь тогтоогдвол ямар хариуцлага тооцох вэ?
-Эрүүгийн хуулийн 111 дүгээр зүйл ангид заасан хэд хэдэн зүйл заалтаар шалгана. Энд нэр төрд халдах, өш хонзон санаж гутаан доромжлох, худал гүжирдлэг, хэвлэл мэдээллийн хэрэгсэл ашиглаж бусдад тараах зэрэг зүйл заалтууд багтана.

111.1.Хүний нэр төр, алдар хүндийг гутаах зорилгоор илт худал гүжирдлэг тараасан бол хөдөлмөрийн хөлсний доод хэмжээг хориос тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.

111.2.Гүтгэлгийг олон нийтэд тараасан, эсхүл доромжлох, гүтгэх гэмт хэрэгт урьд ял шийтгүүлсэн этгээд үйлдсэн бол хөдөлмөрийн хөлсний доод хэмжээг тавин нэгээс нэг зуун тавь дахин нэмэгдүүлсэнтэй  тэнцэх хэмжээний төгрөгөөр торгох, эсхүл гурваас дээш зургаан сар хүртэл хугацаагаар баривчлах ял шийтгэнэ гэх мэтээр хуульчилсан байдаг.

Д.Ундрах /24tsag.mn/