Улаанбаатар хотын иргэд нийтийн тээврээр үйлчлүүлэхдээ “U money” нэртэй ухаалаг карт ашиглахаар болсон. Тус картыг иргэд 3600 төгрөгөөр худалдан авах бөгөөд түүнийгээ карт борлуулах цэгээр 500 төгрөгнөөс 90 хүртэл мянган төгрөгөөр цэнэглүүлэн хэрэглэх юм. Картыг ирэх сараас ашиглаж эхлэх гэж байгаа ч иргэдийн дунд энэ талаарх мэдээлэл хомс байна. Тэгвэл бид энэхүү төслийг хэрэгжүүлэгч “Улаанбаатар смарт карт” ХХК-ны маркетингийн менежер Ц.Түвшинжаргалтай цөөн хором ярилцлаа.

-Ухаалаг картыг хэрэглэж эхлэх хугацааг хэвлэлүүд янз бүрээр бичиж байна. Яг хэднээс эхлэх төлөвлөгөөтэй байна вэ? Мэдээж эхлээд турших байх?

-Төсөл анх 2014 оноос эхлэн хэрэгжиж эхэлсэн. Өнгөрсөн хугацаанд шат дараатай олон туршилт хийгдчихсэн байгаа. Одоо албан ёсны нээлтүүд болох л үлдээд байна. Ирэх 7 сарын 6-нд төслийн албан ёсны нээлт болно. Тэгэхээр 7 сарын 6-наас эхлээд албан ёсоор иргэд картаар үйлчлүүлж эхэлнэ гэсэн үг. Бид одоогоор автобуснуудад тоног төхөөрөмж суурилуулах, “U money” картаа цэнэглэх борлуулах цэгүүдийг байгуулж байна.

-Иргэд эхлээд карт авахад ямар нэгэн бүртгэл хийгдэх үү? Картаа хаяж гээх асуудал гарвал яах вэ?

-Гурван төрлийн карт гарна. Тэр нь бүртгэлийн хувьд хоёр өөр байна. Эхнийх нь хөнгөлөлттэй зорчигчдын буюу бүртгэлтэй карт. Тэрийг хаявал сэргээж үлдэгдлийг хэрэглэгчийн төвөөрөөр дамжуулан шинээр олгоно. Харин нөгөө нь энгийн зорчигчид ашиглах бүртгэлгүй карт. Үүнийг иргэд цахим түрүүвч гэж ойлгох хэрэгтэй. Тиймээс хэрэглэгч өөрийн буруутай үйлдлээс хаяж үрэгдүүлбэл нөхөн олгох боломжгүй. Харин хугалах, гэмтээх эсвэл уншихгүй байх асуудал гарвал хэрэглэгчийн төвд хандан картын үлдэгдэлээ өөр картанд шилжүүлэн авч болно.

-Хөнгөлөлттэй зорчигдын картыг хаанаас авах вэ? Одоо бол өндөр настнууд  халамжаас, оюутнууд холбооноос гэх мэт өөр өөр газраас авч байгаа шүү дээ.

-Ерөнхийдөө өмнө авч байсан газруудаасаа авна. Хөгжлийн бэрхшээлтэй иргэд болон ахмад настнууд  амьдарч байгаа хорооныхоо нийгмийн халамжийн газраас, оюутнууд Монголын оюутны холбооноос, цагдаа нар харьяа байгуулагаасаа авна. Харин картаа хаясан үрэгдүүлсэн тохиолдолд шууд хэрэглэгчийн төвд хандана. Эдгээрээс бусад энгийн зорчигчид болон хүүхдүүд карт цэнэглэх, борлуулах цэгээс худалдан авах боломжтой.

-Энэ ажлыг ихэнхи хүмүүс зөв зүйтэй талаас нь харж байгаа байх. Гэхдээ манай иргэд автобусаар үйлчлүүлэх соёлын хувьд доголдолтой тал бий. Чихнэ, түлхэнэ, мөнгөө төлөхгүй дайрна. Тэгэхээр энэ бүхний эсрэг чиглэсэн ямар арга хэмжээнүүд авч байна вэ?

-Тасалбар түгээгч буюу кондуктор гэдэг хүмүүс маань мэдээлэл хяналтын ажилтан болооод ажлаа үргэлжлүүлэн хийнэ. Өөрөөр хэлбэл ухаалаг картаар хэрхэн үйлчлүүлэхийг зорчигчдод зааж өгнө гэсэн үг. Тэгээд ер нь манайхан шинэ юманд амархан дасдаг хүмүүс шүү дээ. Нэг нэгэндээ зааж өгөөд, анхаараад явчихад гайгүй байх. Мэдээж асуудалгүй байна гэж юу байхав. Эхэндээ жаахан асуудалтай байж мэдэх л юм.

Д.Ундрах /24tsag.mn/