Засгийн газрын ээлжит хуралдаанд Замын Үүд-Эрээний боомтыг ашиглан эдийн засгийн чөлөөт бүс байгуулах асуудлыг судалсан дүнгийн талаар Аж үйлдвэрийн сайд Д.Эрдэнэбат танилцуулга хийжээ.

2014 оны 8 дугаар сард БНХАУ-ын дарга Си Зинь Пин манай улсад айлчилсан. Энэ айлчлалаар стратегийн ач холбогдол бүхий хэд хэдэн баримт бичигт гарын үсэг зурсны нэг нь Монгол Улс, БНХАУ-ын хооронд эдийн засгийн чөлөөт бүсийг Замын Үүд-Эрээнийг түшиглэн байгуулах асуудлыг судлах Санамж бичиг юм.  Энэ оны нэгдүгээр сарын 13-нд Монгол Улсын Ерөнхий сайд Аж үйлдвэрийн сайдаар ахлуулсан БХБЯ, ЗГХЭГ, ЭХЯ, ХХЕГ,  ГЕГ, Дорноговь аймгийн Засаг даргын Тамгын газар зэрэг өргөн бүрэлдэхүүнтэй ажлын хэсэг байгуулсан хэмээн Ерөнхий сайдын хэвлэлийн төлөөлөгч Ц.Мөнхтөр мэдээллээ.

Тэрбээр, БНХАУ хөрш орнуудтайгаа эдийн засгийн чөлөөт бүс байгуулах асуудлыг амжилттай хэрэгжүүлж байгаа. Тухайлбал, Казакстан улстай Хоргос нэртэй чөлөөт бүсийн төвийг 2011 онд байгуулсан. Үүнийг олон улсын түвшинд эдийн засгийн харьцааны шинэ загвар хэмээн үзэж байна. Мөн Хятад улс Вьетнам, Лаос, Бирм улстай тус тус эдийн засгийн чөлөөт бүс байгуулах гэрээ хийсэн.

“Монгол Улс ч энэ чиглэлийн үйл ажиллагаанд идэвхитэй хамрагдах нь зөв гэж үзсэн. Замын Үүд бол Монгол Улсын эдийн засгийн хамгийн том  гарц. 2014 онд 1.1 тэрбум орчим ам.долларын эдийн засгийн бараа эргэлт Замын  Үүдээр дамжсан. 400 мянга орчим галт тэрэг 1.9 сая зорчигч, 520 мянган автомашин хилээр нэвтэрсэн байна.

Одоогноор Монгол болон БНХАУ-ын АЖлын хэсэг 4-5 удаа уулзалт хийсэн. Мөн Хятад, Казахстаны хамтарсан чөлөөт бүс болох Хоргост очиж судалгаа явуулсан байна. БНХАУ-ын Худалдааны яамнаас чөлөөт бүс  байгуулах ерөнхий төлөвлөгөөний танилцуулгыг Аж үйлдвэрийн яаманд ирүүлсэн. Засгийн газрын хуралдааны үеэр ё“Ерөхий төлөвлөгөөг нарийвчлан судлаж, цаашдийн төлөвлөгөөгөө гаргаж, хэрэгжүүлэхийг  ажлын төлөвлөгөө гарган судлах ажлаа үргэлжлүүлэхийг Аж үйлдвэрийн сайд Д.Эрдэнэбатад үүрэг болголоо” гэв.

Т.Энхэлээ