Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 104, Ардчилсан хувьсгалын 35 жилийн ойн Үндэсний их баяр наадмын хурдан шүдлэнгийн уралдаан Хүй долоон худагт өнөөдөр боллоо.
Энэ жилийн баяр наадамд уралдахаар 225 шүдлэн бүртгүүлснээс 131 нь гарааны зурхай руу хөдөлсөн.
Хурдан шүдлэнгийн уралдаанд Төв аймгийн Заамар сумын, МУАУ Ж.Түмэн-Өлзийгийн бор хээр үрээ түрүүллээ.
Аман хүзүүнд Завхан аймгийн Яруу сумын уугуул Тод манлай уяач Д.Дагвадоржийн "Тогоруу цавьдар" давхилаа.
Айргийн гуравт Төв аймгийн Бүрэн сумын уугуул, Манлай уяач Х.Улам-Өрнөхийн хээр, айргийн дөрөвт Төв аймгийн Заамар сумын уугуул М.Энхтайваны хөх бор, айргийн тавд Өвөрхангай аймгийн Хархорин сумын уугуул Монгол Улсын Алдарт уяач Х.Гарьдмагнайн хээр үрээ тус тус хурдаллаа.
