Монгол Улсын Засгийн газрын тэргүүн жил хүрэхгүй хугацаанд дахин солигдлоо. Тухайлбал, 2025 оны зургаадугаар сард Монгол Улсын 34 дэх Ерөнхий сайдаар томилогдсон Г.Занданшатар найман сарын дараа албан тушаалаасаа бууж, түүний оронд Н.Учрал 35 дахь Ерөнхий сайдаар томилогдлоо. Шинээр томилогдсон Ерөнхий сайд Н.Учрал Засгийн газрын танхимаа бүрдүүлэх хүрээнд Ерөнхий сайд асан Г.Занданшатарт өөрийн танхимд Тэргүүн шадар сайдаар ажиллах санал тавьсан. Гэвч Монголын улс төрд Ерөнхий сайд дараагийн Ерөнхий сайдын танхимд сайдаар ажиллах нь төдийлөн тохиромжгүй бөгөөд ийм тохиолдол бараг л үгүй.

Харин Ерөнхий сайд асан Г.Занданшатарын хувьд Н.Учралын Засгийн газарт ажиллахаас илүү парламентын улс төрд төвлөрөх магадлал нь илүү биз. Тодруулбал, тэрбээр одоогийн парламентад УИХ-ын гишүүнээр сонгогдон ажиллах хувилбар ч байж болно. Ингэснээр түүнд 2027 оны Ерөнхийлөгчийн сонгуульд нэр дэвших боломж ч нээгдэнэ.

Үүний нэг хувилбар нь Баянзүрх дүүргээс Х.Булгантуяаг эгүүлэн татуулж, Г.Занданшатар өөрөө нэр дэвших.

Баянзүрх дүүргээс сонгогдсон гишүүн Х.Булгантуяаг Төрийн эрх барих дээд байгууллагын эрх мэдлийг хууль бусаар авах зорилгоор үгсэн тохирч гэмт хэрэг үйлдэхээр завдсан гэмт хэрэгт холбогдуулан эрүүгийн хэрэг үүсгэж яллагдагчаар татаад буй. Улмаар түүний бүрэн эрхийн асуудал энэ хаврын чуулганаар хөндөгдөх талаар ч яригдаад байгаа. Хэрэв уг асуудал албан ёсоор баталгаажиж, УИХ-д сул суудал гарвал Г.Занданшатар нөхөн сонгуулиар Баянзүрх дүүргээс нэр дэвшиж, парламентын гишүүн болох боломж бүрдэж магадгүй юм. Ийнхүү Ерөнхий сайдын суудлын өөрчлөлт нь зөвхөн Засгийн газрын түвшинд бус, парламент болон цаашдын улс төрийн томоохон өрнөлүүдийн "эхлэл" ч байж болохоор байна.

Д.Батчулуун