Монголын улс төр өнөөдөр маргаан, талцал, эрх ашигт төвлөрсөн дуулианаар дүүрэн байна. Томоохон төсөл гацаж, эдийн засгийн хэлэлцүүлэг хойшилж, улс төрийн талбар зөвхөн “өшөө авалт, эрх мэдэл” тулалдааны талбар болов. Гэсэн ч энэ дуулианы цаана чимээгүй боловч хүүхэд, залуусын эрүүл мэндэд шууд ач холбогдолтой хууль УИХ-д хэлэлцэгдэх шатандаа орлоо.

Тухайлбал, УИХ-ын гишүүн Т.Мөнхсайхан нарын гурван гишүүний өргөн мэдүүлсэн “Сургуулийн орчны эрүүл мэнд, аюулгүй байдлын тухай” хуулийн төсөл олны анхаарлыг татав.

Энэ хуулийн төсөл улс төрийн оноо авах зорилготой санаачилга бус, харин Монгол улсын ирээдүй болсон хүүхэд, залуучуудын эрүүл мэнд, аюулгүй байдлыг хамгаалах зорилготой бодлогын алхам гэж хууль санаачлагчид тайлбарлаж байна.

Д.Нарансүх: “Сургууль, цэцэрлэгийн засварт ашигладаг будгийн найрлагад байдаг уусгагч бодис нь цусны хорт хавдар үүсгэдэг. Энэ будгийг бүх сургууль, цэцэрлэгийн засварт хэрэглэж байна. Будгийг ашигласан орчинд хамгийн багадаа 28 хоногийн дараа орвол эрүүл мэндэд эрсдэл учрахгүй. Гэтэл манайд засвар хийснээс 4-5 хоногийн дараа хүүхдүүдээ авч байгаа нь бага насны хүүхдүүдийн дунд тохиолдоод байгаа цусны хорт хавдар болон бусад өвчний эрсдэлийг нэмэгдүүлж байна” хэмээн дурдсан.

Өнөөдөр сургуулийн орчинд сурагчдын дунд осол гэмтэл, дээрэлхэлт түгээмэл, ариун цэвэр, эрүүл ахуйн стандарт жигд мөрдөгдөхгүй, сэтгэлзүйн үйлчилгээ дутмаг, хоол, ус, орчны аюулгүй байдал системтэй хяналтгүй байна. Хүүхэд өдөрт хамгийн олон цагийг сургууль дээр өнгөрүүлдэг тул тус орчин хүүхдийн ирээдүйд ноцтой нөлөө үзүүлнэ.

Тус хуулийн гол зорилго нь:

• Хариуцлагыг тодорхой болгох,
• Нэгдсэн стандарт тогтоох,
• Хяналт, хэрэгжилтийг бодит болгох,
• Хүүхдийн эрхийг хамгаалах механизм бий болгох

Хууль санаачлагчдын үзэж байгаагаар, улс төрийн дуулианд дарагдсан ч чимээгүй боловч амин чухал энэхүү алхам нь хүүхдийн төлөө хийсэн бодлогын шийдвэр юм. Эрүүл, аюулгүй орчинд өссөн хүүхэд ирээдүйд хариуцлагатай, бүтээмжтэй иргэн болж, улсын хөгжилд эерэг нөлөө үзүүлнэ.