“Монгол Улс дахь хүний эрх, эрх чөлөөний байдлын талаарх 24 дэх илтгэл, эрүү шүүлтээс урьдчилан сэргийлэх асуудал эрхэлсэн гишүүний тайланг хэлэлцсэнтэй холбогдуулан авах зарим арга хэмжээний тухай” Улсын Их Хурлын тогтоолын төслийг хэлэлцэж байна. Энэ үеэр УИХ-ын гишүүн Б.Энхбаяр асуултад хариуллаа. 

Тэрбээр "Хүний эрхийн Үндэсний коммиссыг байгуулснаас хойш УИХ дээр жил болгон тайлан, итгэлийг хэлбэрийн төдий сонссон болоод явдаг байсан. Явдаг байсан гэж байгаа нь одоо түүх болсон. Хоёр жилийн өмнөөс УИХ дээр ХЭҮК-ын тайланг сэдэвчилж хэлэлцдэг болсон. ХЭҮК-ын тайлан ч ажил хэрэгч, шийдэлтэй, санал зөвлөмжтэй танилцуулагддаг болсон. Хоёр жилийн өмнө ХЭҮК-ыг анх удаа хоёр өдөр дөрвөн сэдвээр хагас сонсгол зохион байгуулсан. ХЭҮК-ын тайлан илтгэлийг сэдэвчилж, сонсгол хэлбэрээр авч үзээд хөндөгдсөн асуудлыг шуурхай шийдэх хүрээнд тогтоол гаргаж, Засгийн газар холбогдох байгууллагуудад чиглэл зөвлөмж өгдөг болсон. Үүний үр дүнд хоёр долоо хоногийн өмнө Эрүүгийн хэрэг хянан шийдвэрлэх тухай хуульд нэмэлт өөрчлөлт оруулаад, эрүүдэн шүүхийн эсрэг, ялангуяа өмгөөлөгчийн эрх зүйн статусыг дээшлүүлэх чиглэлээр УИХ тогтоол гаргаж байсныг хэрэгжүүлээд хууль болгоод гаргачихсан. Одоо бид мөн таван сэдвийн хүрээнд 7 хуудас тогтоол гаргах гэж байгаа юм. Үүний хэрэгжилтийг хянаж, хангаж ажиллах бол ард түмний төлөөлөгч буюу УИХ гишүүн нэг бүрээс хамаарна. Ганц л хүнээс хамаарахгүй ХЗБХ, Хүний эрхийн дэд хороо шахаж, шаардаж ажиллах ёстой болох байх" гэв.