Ерөнхий сайд асан Н.Алтанхуягийн ахлах зөвлөх Л.Гансүх нарт холбогдох шүүх хурал өнөөдөр эхэлсэн ч дахин хойшиллоо. Учир нь Л.Гансүхийн өмгөөлөгч Ц.Цэрэнжээ, Л.Цэндсүрэн нар “Хөтөл цемент шохой” компанийн захирал асан А.Шоовдорыг өмгөөлж байгаа, шүүх хурал нь давхацсан учраас хурлыг хойшлуулах хүсэлт гаргажээ. Шүүх бүрэлдэхүүн хүсэлтийг хүлээн авсан байна. Мөн шүүгдэгчдийн өмгөөлөгчдийн шүүх хуралд оролцуулахыг хүссэн гэрчүүд ирээгүй байна. Тиймээс шүүх хурал дахин 14 хоногоор хойшилжээ. Тус шүүх хурал анх энэ сарын 3-нд Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болсон ч шүүгдэгчдийн өмгөөлөгчид шүүх хуралд Ерөнхий сайд асан Н.Алтанхуяг, Багануурын нүүрсний уурхайн удирдлагууд болон шинжээчдийг оролцуулах хүсэлт гаргаснаар хойшилсон юм. Тэднийг Эрүүгийн хуулийн тусгай ангийн 150.3, 263.2-т зааснаар буруутган шүүх юм. Л.Гансүхийг Шинэчлэлийн Засгийн газраас хэрэгжүүлсэн “Нүүрс” хөтөлбөрийн хөрөнгөнөөс 13 тэрбум төгрөг завшуулсан байж болзошгүй хэрэгт буруутган шүүхээр болсон юм.

Д.Ундрах /24tsag.mn/