Нийтийн тээврийн үйлчилгээнд гараад гурав л хонож буй Угсраа автобус залгаасаараа салж, зорчигчид гэмтсэн хэрэг өчигдөр гарлаа. Сүхбаатар дүүргийн нутаг дэвсгэр Төв шуудангийн урд талын уулзварт 16:00 цагийн орчимд угсраа автобус салж, олон хүн гэмтсэн байна. Энэ талаар Нийслэлийн замын цагдаагийн газрын мэргэжилтнүүд ярихдаа “Угсраа автобус осолдож хоёр хүн хөнгөн гэмтсэн мэдээлэл ирсэн. Хэргийн газарт Нийслэлийн замын цагдаагийн газрын бие бүрэлдэхүүн ажилласан бөгөөд одоогоор ослын шалтгааныг тогтоогоогүй байна” гэсэн юм.

Харин тэнд байсан нэгэн хүн ослын улмаас хоёр гурав биш нилээн хэдэн хүн гэмтсэн. Түргэн тусламжийхан 20 минутын дараа ирж хүмүүсийг Гэмтэл, согог судлалын үндэсний төв рүү аваад явсан гэж ярьжээ.

Угсраа автобусыг Беларусь улсын “МАЗ” компанид үйлдвэрлэсэн бөгөөд 120 хүний багтаамжтай юм. Үйлчилгээнд гарахаас нь өмнө Нийслэлийн удирдах ажилтнууд “Чанартай, найдвартай, тав тухтай” гэж байсан билээ.

Гэтэл үйлчилгээнд гарсан даруйдаа салж унаж буй нь чанаргүй барааг Монголд оруулж ирлээ гэх иргэдийн шүүмжлэлтэй тулгараад байна.

Т.Энхэлээ