Хэд хоногийн өмнөөс нийтийн тээвэрт цахим картны төхөөрөмжийг ашиглаж байгаа.

Иргэд карт ашиглан нийтийн тээврээр зорчиж байгаа бол карт аваагүй нь мөнгөний хайрцаганд бэлнээр нь 500 төгрөгөө хийж байгаа билээ. Гэтэл “Цахилгаан тээвэр” компанийн кондукторууд мөнгөний хайрцагнаас мөнгө хулгайлдаг байсан нь өчигдөр олон нийтэд ил болж, багагүй шуугиан тариад байна. Тэд мөнгөтэй хайрцаг руу төмөр хавчуур шургуулж мөнгө авдаг байжээ. Тэр бүү хэл мөнгийг хэд, хэдэн удаа хулгайлсан байна.  Цахим карт ашигладаг болсноор нийтийн тээврийн орлого хоёр дахин нэмэгдэж байснаа удалгүй эргээд буурчээ. Үүнийг шалгаж камер хянаж үзэхэд кондукторууд хайрцганд урт нарийхан төмөр шургуулж өдөрт 2-3 удаа мөнгө авдаг байсан нь ил болоод буй нь энэ юм. Зарим нь камерыг цамцаараа хааж байгаад мөнгө авдаг байсан байна. Харин тэдний яриа нь камерын бичлэгт үлдсэнийг ийнхүү олж илрүүлжээ.

Уг хэргийг одоо цагдаагийн газарт шалгаж байгаа юм байна.

Т.Сар