“МОНГОЛ УЛС ДАХЬ УГСААТАН СУДЛАЛЫН ШИНЖЛЭХ УХААН: ӨНГӨРСӨН, ОДОО, ИРЭЭДҮЙ” олон улсын эрдэм шинжилгээний бага хурал маргааш болох гэж байна.

ШУА-ИЙН ТҮҮХ, АРХЕОЛОГИЙН ХҮРЭЭЛЭН уг арга хэмжээг зохион байгуулж байгаа бөгөөд хурал маргааш  09 цагт ШУА-ийн хүрээлэнгүүдийн байр-410 тоот хурлын танхимд эхлэх аж.

Монгол улсад угсаатан судлалын шинжлэх ухааны анхны мэргэжилтэнг 1950-иад оны сүүл үеэс бэлтгэж эхэлсэн байна. 1961 онд ШУА-ийн Түүхийн хүрээлэн байгуулагдахад ууган салбаруудын нэг нь Археологи-Этнографийн салбар өргөжин, ШУА-ийн Ерөнхийлөгчийн 1985 оны 9 дүгээр сарын 10-ны өдрийн тушаалаар Угсаатны зүйн сектор байгуулагджээ. Мэргэжлийн судлаач, эрдэмтдээс бүрдсэн судалгааны шинэ салбар үүсэн байгуулагдсан нь Монгол улсад угсаатан судлалын шинжлэх ухааны хөгжилд ихээхэн ач холбогдолтой үйл явдал болсон байна. Тиймээс ШУА-ийн Түүх, археологийн хүрээлэнгийн Угсаатан судлалын салбар бие даан байгуулагдсаны 30 жилийн ой, Монгол улсад угсаатан судлалын шинжлэх ухааны салбар үүсч хөгжсөний 60 гаруй жилийн судалгааны үр дүнг хэлэлцэхийн тулд олон улсын эрдэм шинжилгээний хурал зохион байгуулах гэж байгаа гэлээ.

Тус хурлаар Монгол улс дахь угсаатан судлалын шинжлэх ухаан үүсэл, хөгжил, монгол угсаатны угсаа гарвал, ахуй, соёл, орчин үеийн угсаатны нийгэм- соёлын судалгаа, түүний цаашдын чиг хандлагыг тодруулахыг зорьж байна. 

Г.Үжин