Ерөнхий сайд асан Н.Алтанхуягийн ахлах зөвлөх Л.Гансүхэд холбогдох шүүх хурал Баянзүрх, Сүхбаатар, Чингэлтэй дүүргийн шүүхэд болж байна. Дөнгөж сая шүүгдэгчдийн өмгөөлөгч нар шүүх бүрэлдэхүүнээс татгалзсанаар шүүх хурал дахин завсарлалаа.

Өмгөөлөгч нар дараах хоёр шалтгаанаар шүүх бүрэлдэхүүнээс татгалзаж байна.

Нэгдүгээрт, өмгөөлөгч нарыг хавтаст хэрэгтэй танилцуулаагүй аж. Хууль ёсоор өмгөөлөгч хавтаст хэрэгтэй танилцах, хуулж авах эрхтэй байдаг аж. Гэвч өмгөөлөгчдийг энэ эрхээ эдлэхийг хүлээн зөвшөөрөөгүй байна.

Хоёрдугаарт, өмнөх хоёр шүүх хурал хоёулаа Ерөнхий шүүгчийг захирамжгүйгээр явагдсан байна. Эхний шүүх хурал дээр захирамжгүй томилогдсон шүүгчид Л.Гансүх нарыг хорих шийдвэр гаргасан. Харин хоёр дахь шүүх хурлаар мөн л батлагдаагүй шүүгчид Л.Гансүх нарыг дахин хорих шийдвэр гаргаж, өмгөөлөгч нарт торгууль тавьсан байна. Энэ нь процедурын алдаатай шүүх хурал бослон хэмээн өмгөөлөгчид мэдүүллээ. Энэ удаагийн шүүх хурлыг ч мөн захирамжгүй шүүгчид явуулж байна.

Дээрх шалтгаануудаар шүүгчид ашиг сонирхлын зөрчил гаргасан гэж үзээд шүүх бүрэлхүүнээс татгалзлаа. Шүүх бүрэлдэхүүн татагалзах саналыг ерөнхий шүүгчтэй хэлэлцэхээр түр завсарлаад байна.

Өмнөх шүүх хурал дээр ч өмгөөлөгч нар шүүх бүрэлдэхүүнээс татгалзах хүсэлт гаргасан ч хүлээн аваагүй юм.

Шүүх хуралд Ерөнхий сайд асан Н.Алтанхуяг гэрчээр ирсэн байна.

Шүүх хуралд гэрчээр оролцох н.Сономпил, н.Жигжид  нар ирээгүй юм. Сономпил Москва, Жигжид Сөүл явсан талаарх албан бичгийг Тахарын алба шүүхэд ирүүлсэн тухай мэдээлсэн билээ.

Б.Батчимэг