УИХ-ын гишүүн Г.Уянга Ерөнхий сайд асан С.Баярын эхнэр, хүүхдүүдийн эзэмшдэг гадаад дахь олон сая долларын үл хөдлөх хөрөнгийн тухай анхаарал татсан баримтуудыг олон нийтэд дэлгэсэн.

Г.Уянга гишүүний мэдээллийн дагуу АТГ-аас С.Баярыг шалгах үйл ажиллагааг хэдэн сарын өмнө эхлүүлсэн. Тэгвэл АТГ-аас С.Баярт эрүүгийн хэрэг үүсгэхээс татгалзсан гэдгийг өнөөдрийн чуулганы хуралдааны үеэр тус байгууллагаас мэдэгдлээ. 

Өнөөдрийн хуралдаанаар Өршөөлийн хуульд тавьсан Ерөнхийлөгчийн хоригийг хэлэлцэж байгаа юм.

 Энэ үеэр УИХ-ын гишүүн Г.Уянга: “Иргэн С.Баяртай холбоотой асуудлаар Авлигатай тэмцэх газар хэрэг үүсгэн шалгаж байгаа юу. Өршөөлийн хуульд Ерөнхийлөгч хориг тавиагүй бол өршөөлд хамрагдах байсан уу. Эдийн засгийн ил тод байдлын тухай хууль Өршөөлийн хуулиас ч аюултай. Үүнд Ерөнхийлөгч хориг тавиагүй нь гайхал төрүүлж байгаа. Эдийн засгийн ил тод байдлыг хангах тухай хуулиар санхүүгийн зөрчлийг өршөөнө. Хамгийн том хэрэг бол Оюутолгойд хамаарна, 1.8 тэрбум ам.долларын зөрчил байгаа. Энэ бүхэн хэрэгсэхгүй болно.

Авлигатай тэмцэх газрын дэд дарга н.Нямдорж: Иргэн С.Баяртай холбоотой асуудлыг Авлигатай тэмцэх газар өөрийн эрх хэмжээний хүрээнд шалгах ажлыг зохион байгуулж, эрүүгийн хэрэг үүсгэх бүрэн дүүрэн үндэслэл алга гээд түдгэлзүүлсэн.

УИХ-ын гишүүн Г.Уянга: “Яг л ийм асуудал болоод байгаа. Ерөнхий сайдын ажлаа өгсний дараа олон тооны үл хөдлөх хөрөнгө илэрсэн нь жирийн хэрэг биш, гэтэл жараахай хөөцөлдөөд явдаг” гэсэн юм.

Т.Хулан