Япон улсын нийслэл Токио хотноо 2015 оны 09 сарын 01- 03 -ний хооронд Хөгжлийн бэрхшээлтэй хүмүүсийг хамт олонд түшиглэн сэргээн засах, Ази Номхон Далайн Бүсийн 3 -р Чуулган амжилттай зохион байгуулагдлаа. Тус чуулганд 40 гаруй орны 500 гаруй төр, төрийн бус, иргэний нийгэм, олон улсын байгууллага, хөгжлийн бэрхшээлтэй иргэд оролцлоо. Чуулганы оролцогчид хөгжлийн бэрхшээлтэй иргэдийн тэгш эрх, ялгаварлан гадуурхалт, хөдөлмөр эрхлэлт, боловсрол, хүүхэд, эмэгтэйчүүдийн эрх, гамшигийн эрсдэлт үед хөгжлийн бэрхшээлтэй иргэдэд үзүүлэх тусламж үйлчилгээ, хүртээмжтэй орчин, эрх мэдэлжүүлэлт, хамруулан хөгжүүлэлт, хамтын ажиллагаа зэрэг олон чухал сэдвүүдээр илтгэл тавин туршлага солилцон оролцлоо.
Монгол улсаас нийт 30 гаруй хүмүүсийн бүрэлдэхүүнтэй төлөөлөл оролцлоо. Бүрэлдэхүүнд ХАХНХЯ -ны ХБИХХ -ийн дарга Т. Батдулам, СЗХҮТ-ийн дэд дарга Т. Мөнх-Очир, аймаг, дүүргийн Хөгжлийн бэрхшээлтэй иргэдийг хамт олонд түшиглэн сэргээн засах "Тэгш дүүрэн" хөтөлбөрийн зохицуулагч нар, Италын төрийн бус АИФО байгууллагын Монгол дахь суурин төлөөлөгч Д. Тулгамаа, менежер Л. Энхбуянт, Монголын хараагүйчүүдийн үндэсний холбооны тэргүүн Д. Гэрэл, удирдах зөвлөлийн гишүүн М. Баясгалан, Бие даан амьдрах төвийн тэргүүн Ч. Ундрахбаяр, Оюуны Дархлаа ТББ-ын тэргүүн Г. Энхбаатар, Тэгш нийгэм төрийн бус байгууллагын гүйцэтгэх захирал Д. Батболд нар оролцлоо.
Чуулганыг нээж Зохион байгуулах хорооны дарга, ноён Шигерю Сумитани, Ази Номхон далайн орнуудын Хамт олонд түшиглэн сэргээн засах сүлжээний хорооны гишүүн, ноён Тулика Дас, Японы хунтайж, Хөгжлийн бэрхшээлтэй хүмүүсийн Сэргээн засах нийгэмлэгийн хүндэт тэргүүн Хитачи, Япон Улсын эрүүл мэнд, хууль зүй, Халамжийн дэд сайд Кейко Нагаока, ДЭМБ-ын Хөгжлийн бэрхшээлтэй хүмүүсийн сэргээн засалт, эрүүл мэндийн тусламж үйлчилгээ хариуцсан захирал, хатагтай Паулина Клейниц, Ази Номхон далайн бүсийн Хамруулан хөгжүүлэх хорооны тэргүүн ноён Теж Буннаг нар оролцож, үг хэллээ.
Тэд хэлсэн үгэндээ “Хөгжлийн бэрхшээлтэй иргэдийн амьдралын чанарыг сайжруулж, ядуурлыг бууруулах, хөгжлийн бэрхшээлтэй иргэдийн эрхийг бүрэн дүүрэн хэрэгжүүлж, бүх талын үйл ажиллагаанд тэдний оролцоог хангаж, манлайлалыг дээшлүүлж, хүйсийн мэдрэмжтэй байдлыг нэмэгдүүлэн бизнест хамруулах нөхцөлийг бүрдүүлэх зорилт тавьсан. Эдгээр зорилтыг хэрэгжүүлэхийн тулд гишүүн орнууд улсын төсөвтөө тодорхой санхүүжилт тавих ёстой. Хамгийн гол нь төрийн болон төрийн бус байгууллагууд, хөгжлийн бэрхшээлтэй иргэд, тэдний ар гэрийнхэний хамтын ажиллагаа, салбар хоорондын уялдаа холбоо чухал” гэж онцлон тэмдэглэлээ.
Чуулганы хуралдааны үеэр Ази, Номхон Далайн Бүсийн орнуудын Хамт олонд түшиглэн сэргээн засах сүлжээний Гүйцэтгэх хорооны гишүүд хуралдаж, тус хорооны Дэд даргаар Монгол улсын ХАХНХЯ-ны Хөгжлийн бэрхшээлтэй иргэдийн хөгжлийн хэлтсийн дарга Т. Батдулам сонгогдлоо. Мөн Монгол улс Индонез, Бангладеш, Пакистан зэрэг орнуудтай, эх орондоо дараагийн хурлыг зохион байгуулах эрхийн төлөө өрсөлдөж гүйцэтгэх хорооны гишүүдийн 100 хувийн саналаар Хамт Олонд Түшиглэн Сэргээн Засах- Ази Номхон Далайн Бүсийн 4 - дүгээр чуулганыг Монгол улсад 2019 онд Улаанбаатар хотноо зохион байгуулах эрхийг авлаа.
Энэхүү нэр хүндтэй чуулганыг Монгол улсад зохион байгуулах нь манай улсын хувьд өндөр ач холбогдолтой бөгөөд хөгжлийн бэрхшээлтэй хүний эрхийг хангах, ялгаварлан гадуурхалтыг багасгах, хүртээмжтэй орчныг бий болгох, хөдөлмөр эрхлэлтийг нэмэгдүүлэх, улс төр ба шийдвэр гаргах түвшинд хөгжлийн бэрхшээлтэй иргэдийн оролцоог нэмэгдүүлэх, бүс нутгийн түвшинд төрийн болон төрийн бус байгууллагууд, хөгжлийн бэрхшээлтэй иргэдийн байгууллагуудын хоорондын хамтын үйл ажиллагааг сайжруулахад мөн НҮБ-ын Хөгжлийн бэрхшээлтэй иргэдийн эрхийн тухай конвенцийг хэрэгжүүлэхэд томоохон хувь нэмэр оруулна гэдэгт найдаж байна.
Энэ нь бүс нутгийн орнуудтай туршлага солилцох, бүхий л талын дэмжлэгийг Монголдоо авч хамтран ажиллахад чухал үйл явдал болох юм.
