Сонгууль эхлэнгүүт АН тэрбумыг цацлаа.  Буянт-Ухаа дахь спорт цогцолборт нэр дэвшигчдэд батламж гардуулах ёслол сүр дуулиантай болов. Ирэх сард болох Лондонгийн олимпын нээлтээс дутахааргүй. 

    Сонгууль эхлэнгүүт АН тэрбумыг цацлаа.  Буянт-Ухаа дахь спорт цогцолборт нэр дэвшигчдэд батламж гардуулах ёслол сүр дуулиантай болов. Ирэх сард болох Лондонгийн олимпын нээлтээс дутахааргүй.  Тэрбумын өртөгтэй энэхүү ёслол ямар ач холбогдолтой вэ. Нэр дэвшигчдэд батламж гардуулах үйл ажиллагааг баяр наадам мэт зохион байгуулах шаардлага бий юу.  Нэр дэвших эрхээ баталгаажуулж, гарын үсэг зурах, намын хамт олон амжилт хүсэх, намын удирдлага ямар байр суурь, бодлоготой өрсөлдөхөө илэрхийлэхэд хангалттай юм. Монгол Ардын Намын нэр дэвшигчдэд батламж гардуулах ёслол албан ёсны арга хэмжээ хэлбэрээр зохион байгуулагдсан. Түүнд тэрбум атугай таван төгрөг ч зарцуулаагүй байх жишээтэй. АН ийн сүржигнэж байхад Ардын Нам бол аядуухан нэр дэвшигчдээ зарлачихлаа. Улстөрийн намын төлөвшил, хандлагын зааг ялгаа энэ мэтээр илэрч, ард түмэнд үнэлэгдэж явдаг. Харамсалтай нь АН-ынхан өөрсдөө үнэлэмжээ үргэлж унагадаг.  АН-ыг дэмждэг нөхөр  тус намын өндөр өртөгтэй шоунд нь эгдүүцэж эсрэг санал өгнө биз дээ.

    Угаас Сонгуулийн тухай хуульд намууд болон нэр дэвшигчид биеийн тамирын уралдаан, тэмцээн, баяр наадам, урлагийн тоглолт зохион байгуулах, түүнийг ивээн тэтгэх, хүлээн авалт, цайллага, дайллага зэрэг сонгуулийн сурталчилгаатай холбоотой олон нийтийг хамарсан арга хэмжээ зохион байгуулахыг хориглосон.
    Гэтэл АН-ын  нэр дэвшигчдэд  батламж гардуулах ажиллагаа нь  олон нийтийг хамарсан баяр ёслол мэт болов. Энэ бол сонгуулийн сурталчилгаа эхлээгүй байхад сурталчилгаа хийж, бас баяр ёслол зохион байгуулахыг хориглосон хуулийн заалтыг зөрчлөө. Гараан дээрээ хуулиа зөрчиж эхэлж буй тул цаашид хуулийг гууль болгож мэдэхээр болж байна. Улстөрийн хоёрдогч хүчин гэгдэх АН хуулиа зөрчиж эхлэхэд бусад жижиг улстөрийн  нам эвслүүд дагаад хууль зөрчихийг үгүйсгэхгүй.  Сонгуулийн шинэ хуульд орсон дээрх хатуухан заалтууд нь сонгогчийг аливаа зүйлээс үл хамааран өөрийн бодол, ухаанаар сонголтоо хийх боломжийг нээсэн билээ. Харин АН урьдын арга барилаар хандаж, нүсэр шоу цэнгээнээр сонгогчдын тархийг угаах гэж оролдлоо. Хуулийн наана цаадахыг ашиглах арга мэхэндээ тэд хэнийг ч үл дагуулна. Нэр дэвшигчдэд батламж өгөх нэрийдлээр сонгуулийн сурталчилгааны шоу хийчих юм. Мөн Баянмонгол корпориацийн тухай хууль хэмээн өргөн барьж мөнгөний амлалтыг өгч байгаа. Сонгуулийн мөрийн хөтөлбөрт мөнгө дагасан бүхий л амлалт, арга хэмжээг тусгахыг хориглосон байхад АН хууль нэрээр амлалтыг өгч, хуулийн сиймхийг ашиглав. Гэхдээ сонгогчид наантай цаанатай ойлгож байна. Түүний нэг илрэл нь Буянт-Ухаа дахь спорт цогцолборт дахь нүсэр зардалтай ёслол танхим дүүрсэнгүй. Иргэд сонгогчид улстөрийн нүсэр үйл ажиллагаанаас залхаж зайгаа барьж байна. Шоутай, шоугүй ихэнх сонгогчид нэр дэвшигчдийг зарлахад л сонголтоо хийдэг.
    Харамсалтай нь АН сүрийг үзүүлсэн энэхүү арга хэмжээгээ эртнээс төлөвлөж, олныг хамруулахыг ихэд хичээсэн байна.
Хөдөө орон нутгийнхны зардалыг дааж ирүүлдэг тус намын уламжлалт ажиллагаанд өртсөн  мянга орчим хүн танхимд голлож байв.  Сонирхож ирсэн зарим нь ажил төрлөө бодоод гараад явж гэнэ. Танхим дахь хүмүүсийнхээ ирц дээр анхаарах сануулга зохион байгуулагчдад ирсэн байна. Зохион байгуулагч хаалга барьж, иргэдийг гаргахгүй гэж үзэлцжээ. Хүний эрхэнд ноцтойгоор халдаж байгаа хэрэг шүү дээ. Ингээд хэрүүл уруултай гарсан хүмүүс бачимдаж уцаарлаад “танай намд саналаа өгөхгүй” гэж хэдэрлэхэд нэг саагсан залуу заамдан авч тэр хавьдаа л хөөрхөн улстөрийн дажин болсон сураг байна. Зах зухын сонин энэ. Харин дотор танхимд хошин шогийн дажгүй үзүүлбэр тавигдсан гэнэ. 76 нэр дэвшигчид хороороо дуу аялж, бөмбөлгөөр наадаж, туузанд нь хөл нь орооцолдоод унаж туссан тухай хүүхэд багачууд, хөгшид хөгжилдөн ярих ажээ. Манайхан чинь их шооч улс шүү дээ. Аливаа зүйлийг өөг андахгүй өлгөж авч егөөдөцгөөдөг нь гэм биш зан. Энэ мэт будилсан, бухимдсан авир төрх ч яахав. Хамгийн гол нь тэрбумыг зарцуулж эхэллээ.  Тэгэхээр жинхэнэ сонгуулийн сурталчилгаа эхлэхэд хэдийг зарцуулах нь тодорхой юм. Үнэндээ бол АН олигархижсан улстөрийн хүчин гэдгээ харуулж байна. Өнөөдөр нь намд нь элсээд маргааш нь нэр дэвшсэн Б.Наранхүүгийн хандивласан тэрбумаар зохион байгуулсан ч байж магад. Гэхдээ ганц Б.Наранхүү гэлтгүй тэрбумыг тэр өдөрт нь салхинд хийсгэх олигархууд тус намд олон.