Долдугаар сарын 1-ны хэрэгт буруутгагдаад буй цагдаагийн экс дарга нарт холбогдох шүүх хурал өнгөрсөн мягмар гаригт болох байсан ч тэдний биеийн байдлын улмаас хойшилсон.
    Долдугаар сарын 1-ны хэрэгт буруутгагдаад буй цагдаагийн экс дарга нарт холбогдох шүүх хурал өнгөрсөн мягмар гаригт болох байсан ч тэдний биеийн байдлын улмаас хойшилсон. Гэхдээ Ч.Амарболд, О.Зоригт нарыг хагалгаа хийлгээд удаагүй байхад нь Сүхбаатар дүүргийн шүүхээс шүүх хуралд заавал оролцуул хэмээн тэргэнцэр, дамнуургатай нь цагдан хорих 461 дүгээр төв рүү авч явсан юм. Харин энэ талаараа өчигдөр Сүхбаатар дүүргийн шүүхийн Тамгын газрын дарга Э.Батмөнх “Шүүгдэгч нар шаардлагатай гэж үзсэн эмчилгээ үйлчилгээг авсан. Тэднийг эмчилж буй П.Н.Шастины нэрэмжит төв эмнэлгийн эмчилгээ эрхэлсэн орлогч дарга Ц.Төмөр-Очир ирүүлсэн эмнэлгийн магадлагааг үзээд, Сүхбаатар дүүргийн шүүхээс цагдан хорих 461 дүгээр төвийн эмнэлэгт эмчилгээг үргэлжлүүлэх боломжтой гэж үзсэн. Мөн шүүгдэгч Ч.Амарболдын гэр бүлийнхэн шүүхийн зөвшөөрөлгүй Ч.Амарболдыг сахиж байсан” гэв. Мөн “Ирэх лхагва гаригт шүүх хурал болно. Тэдний биеийн байдал шүүх хуралд оролцож чадахгүй болтлоо муудаагүй байгаа. Тиймээс шүүх хурлын товолсон цагтаа явуулна” гэлээ.