Өчигдөр Сөүл хотын Намдэмүн дүүргийн цагдаагийн газраас хулгай хийсэн хэргээр Монгол улсын иргэн, эрэгтэй A -г саатуулжээ. А нь тус улсад хууль бусаар ажиллаж амьдардаг ба 2010 оны долдугаар сараас эхлэн Кёнгиду, Сонгнамд байрлах нэгэн айл нүүлгэлтийн компанид ажиллаж эхэлжээ. Тэрээр энэ хугацаанд нүүлгэж байгаа айлынхаа эд хогшлоос зөвхөн алтан эдлэлүүдийг хулгайлдаг байсан ба одоогоор гурван удаагийн үйлдлээр, нэг сая 300 мянган воны үнэ бүхий бусдын алтан эдлэлийг хулгайлсан нь илрээд байна. А-гийн ажилладаг айл нүүлгэдэг компаниар үйлчлүүлсэн нэлээдгүй иргэд алтан эдлэлээ алдсан тухай мэдээлэл өгч байх үед, А нь хувийн эдлэлээ зарж байгаа мэт санагдуулах зорилгоор найз бүсгүйнхээ хамт хулгайлсан зүйлээ алт мөнгөний дэлгүүрт очин зардаг байсан ажээ. Цагдаагийн газраас хулгайн эд зүйлээ алт мөнгөний дэлгүүрт зарж байсан түүний нууц камер дахь бичлэгүүдийг эд мөрийн баримт болгон цуглуулаад байна.
Би хулгай хийгээгүй , харин орон доор унасан алтан эдлэл олсноо авсан гэж мэдүүлж буй тэрээр өөртэйгээ төстэй гэрээний ажилчин өөр нэгэн Монгол залуугийн жолооны үнэмлэхийг нэг сая 400 мянган воноор худалдан авч , улмаар энэхүү бичиг баримтыг ашиглан автомашин жолооддог байсан байна.
Сүүлийн үед тус улсад хууль бусаар ажиллаж амьдарч байгаа гадаадын иргэд, ялангуяа Монгол залуус айл нүүлгэх ажил ихээрээ хийх болсон. Нүүж байгаа айл өрхүүд эд хогшил, өөрсдийн үнэт эдлэлээ тэр бүр нарийн хадгалж чаддаггүйг ашиглан эдгээр хууль бус гадаадын ажилчид түүнээс хулгайлах явдал цөөнгүй гарч байгаа. Бид цаашид энэ тал дээр яаралтай арга хэмжээ авах болно гэж дээрх мэдээллийг хийсэн цагдаагийн ажилтан хэлжээ.
Мөн энэ хэрэгт А-гийн найз бүсгүй, түүнд жолооны үнэмлэхээ зарсан Монгол залуу нарыг холбогдуулан шалгаж байгаа ажээ.
