МУИС сургалтын төлбөрийн нэмэгдлээр номын сангийн барилга барьж байгаа гэх мэдээлэл бидэнд ирлээ. Тодруулбал, улсад харьяалагддаг тус сургуулийн хувьд төсвийн мөнгөөр барих ёстой барилгыг оюутны төлбөрөөр барьж эхэлсэн нь маргаан дагуулж эхэллээ. Үүнийг багш, оюутнууд эсэргүүцэж байгаа бөгөөд тус барилгын төсөвт зарцуулж буй мөнгийг багш, оюутны сургалтын үйл ажиллагаанд зарцуулахыг шаарджээ. Өөрөөр хэлбэл, багшийн цалинг ч нэмэхгүй, сургалтын чанартаа ч анхаарахгүй байж ийм зүйл хийж байгаа нь асуудал үүсгэх нь дамжиггүй.

2015 оны есдүгээр сард хийсэн төсвийн тодотголоос гарсан зөрүү мөнгийг цалинд бус номын сангийн төсөвт зарцуулсан байна.

Тус сургуулийн төсвийн тодотголоос харахад энэ хичээлийн жилийн сургалтын төлбөрийн орлого 29 тэрбум төгрөгөөр батлагджээ. Гэхдээ энэ нь төлбөр нэмэгдээгүй байх үеийн тооцоолол бөгөөд нэмэгдсэн дүнгээр үзвэл 31 тэрбум болж байгаа аж. Харин энэ хоёрын зөрүү нь хоёр тэрбум төгрөг бөгөөд энэ нь зөвхөн эхний хагас жилийн төлбөрөөс төвлөрөх орлого аж. Өөрөөр хэлбэл, хоёрдугаар улиралд ахин хоёр тэрбум төгрөг орж ирнэ гэсэн үг.  Гэтэл өдгөө сургалтын төлбөрөөс орж ирэх дөрвөн тэрбумын зөрүүг номын сангийн барилгад шингээсэн аж. Үүгээр л үл барам бас бус төсвөөс тодотгол хийж,  тус номын сангийн барилгын санхүүжилтэд нэмэрлэжээ.

Д.Ундрах /24tsag.mn/