Уулзсан хүн бүр л хувьцаа ч, мөнгө ч авна гэж яриад байгаа юм даа.  Гэтэл Засгийн газар нэг хэсэгт нь мөнгө өгч эхэлснээ “Одоо болъё, Мөнгө авсан хүмүүс мөнгөө буцааж тушаагаад оронд нь хувьцаагаа авчих” гэх юм. Ёстой нэг даажигнах гэж энэ үү гэж бодогдоно. Хөгжлийн бэрхшээлтэй болон ахмад настнуудад нэг сая төгрөгийн эхний хэсэг нь гэж 330 мянган төгрөг олгосон. Одоо 670 мянган төгрөг өгөх ёстой. Гэтэл мөнгө авсан хүмүүс  мөнгөө буцааж болно гэнэ. 330 мянган төгрөг аль хэдийнэ Эрээний бараа, идэж уух юм болоод дууссан гэдгийг тооцдоггүй Сангийн сайдтай байх гэж. Өгсөн мөнгөө хоёр долоо ч хонуулахгүй буцааж авъя гэж нэхэл дагал болдог Засгийн газартай байх гэж. Арай л дэндүү байна
.

    Засгийн газар уржигдрын хуралдаанаараа ийм шийдвэр гаргасан юм. “Үндэсний аж ахуйн нэгжүүдэд “Эрдэнэс Тавантолгой” компанийн хувьцааг худалдах, иргэн бүрт хувьцаа эзэмшүүлэх, иргэдийн хувьцааг Засгийн газар худалдан авах үйл ажиллагааг зохицуулах журам” журмыг Засгийн газрын хуралдаанаар хэлэлцэн баталжээ. Энэ дагуу нэг сая төгрөгөө бэлнээр авсан ахмад настан, хөгжлийн бэрхшээлтэй иргэд хувьцаа эзэмших хүсэлтэй бол нэг сая төгрөгөө буцаан төлж, хувьцаатай болох боломжийг дээрх журмаар бүрдүүлэх аж. Ийм хүсэлтэй иргэд байвал тухайн сум, хорооны нийгмийн ажилтандаа хандах шаардлагатай  гэнэ.

    Уучлаарай, буцааж авах гэж байгаа нэг сая төгрөгийг чинь  монголчууд бүгдээрээ аваагүй байна. Хэдхэн хүн 330 мянган төгрөг авсан гэдгийг тооцож үзэх ёстой. Засгийн газар, түүнийг бүрдүүлж буй МАН-ынхан дөнгөж хэдхэн хүнд өгч эхэлсэн мөнгөө буцааж авъя гэсэн нь цаанаа ихээхэн учиртай аж. Засгийн газар дээрх журмыг гаргасан нь ахмад настан, хөгжлийн бэрхшээлтэй иргэдэд үргэлжлүүлж өгнө гэсэн 670 мянган төгрөг бэлэн биш байгааг нотолсон хэрэг. Дээрх хоёр ангилалд багтаж буй 334 мянган иргэнд нэг сая төгрөг эхний ээлжинд өгөхөөр улсын төсөвт 334 тэрбумыг тусгасан л даа. Цаасан дээр бичсэн тоо болохоос биш Монгол Улсын түрийвчинд бэлэн биш байгаа гэдэг нь ойлгомжтой байна.
    Төсвийн мөнгө хүрэлцэхгүй болохоор Хөгжлийн банкнаас мөнгө саахаар зэхэж байгаа гэнэ. Өнөөх та бидний ярьдаг, хоёр сайдын хаврын хэрүүлийн сэдэв байсан төмөр замыг энэ Хөгжлийн банкнаас санхүүжүүлэх ёстой. Ер нь ирээдүйд үр өгөөжөө өгөх гол төсөл, хөтөлбөрүүдийг санхүүжүүлэх эх үүсвэр бүрдүүлэхээр Хөгжлийн банк байгуулсан юм. Иргэдэд олгох мөнгийг чухал хөтөлбөрүүдийг санхүүжүүлэх банкнаас татвал төмөр зам ч үгүй болох юм байна. Хэдэн төгрөг өгч иргэдийн саналыг худалдаж авч, Засгийн эрх мэдлийг авч л байвал ирээдүйд бүтээхээр төлөвлөсөн гоё, сайхан ажлууд хамаагүй гэж хаяж байгаа бололтой. Эрх баригч хүчин МАН-ын  сонгогчдын саналыг татах арга хэтэрхий арчаагүй, арай ч дээ л гэмээр байна. Иргэдийн саналыг л авч байвал юу хийх нь хэнд ч хамаагүй гэсэн тэдний арчаагүй бодол. Монголын ирээдүй гэж байгааг эрх баригчид санах ёстой биз дээ.
    Тэр ч бүү хэл Хөгжлийн банкны мөнгө хүрэлцэхгүй бол Хятадаас мөнгө зээлэх санаа ч эрх мэдэлтнүүдийн толгойд эргэлдэж байгаа сурагтай шүү. Урд хөршөөс яаж мөнгө татна гээч. Тавантолгойг барьцаалж мөнгө зээлэх юм гэнэ ээ. Энэ арай дэндүү юм. Тэгээд монголчууд бид төмөр зам ч үгүй, Тавантолгой ч үгүй үлдэх юм байна. Монголын хөгжлийн нэг зүтгүүр нь төмөр зам, ирээдүйд Монголыг тэжээх нэг саалийн үнээ нь Тавантолгой гээгүй билүү.  Ард түмнээ хоосруулж, газар нутгаа худалддаг МАН-ын арга дэндүү арчаагүй байна. Хэрэв ийм дээрээ тулбал сонгуулийн маргааш  Монгол Улс орших уу, эс орших уу гэдэгт л тулах нь дээ. Өөрийнхөө эх оронд сайхан амьдармаар байна, МАН-ынхаан.