Шатахууны үнэ нэмэгдэх сургаар л өргөн хэрэглээний бараа бүтээгдэхүүний үнэ суга өсч, тэр хэрээр иргэдийн халааснаас гарах мөнгөний хэмжээ нэмэгддэг.  Гэтэл бензиний үнэ литр тутамдаа 80-150 төгрөгөөр буурсан атал өнөөдөр бараа бүтээгдэхүүний үнэ буурах бус харин ч нэмэгджээ.

Сар гаруйн өмнө буурсан бензиний үнэ өргөн хэрэглээний бараа бүтээгдэхүүнд хэрхэн нөлөөлсөн талаар мэдээлэл бэлтгэхээр Хүчит шонхор худалдааны төвийг зорилоо. Шинэ он, цагаан сар гээд монголчуудын өргөн дэлгэр тэмдэглэдэг баярууд ойрхон тохиосон болоод тэр үү хөл хөдөлгөөн нэлээд багатай байв. Худалдан авалт ч төдийлөн сайнгүй байгаа гэдгийг худалдаа эрхлэгчид хэлж байлаа.

Сар шинийн баяраар үнэ нь өсөөд байсан махны үнэ л гэхэд дахин нэмэгджээ.  Тухайлбал, үхрийн ястай мах нэг килограмм нь дунджаар 7095 төгрөгөөр худалдаалагдаж байна. Энэ нь өмнөх долоо хоногоос 190 төгрөгөөр нэмэгдсэн үнэ бол үхрийн цул мах 170 төгрөгөөр нэмэгдсэн гэдгийг махны худалдаачид хэлж байлаа.

Хонины ястай нэг килограмм нь 5500-6500 төгрөгийн үнэтэй байна. Энэ нь мөн л өнгөрсөн долоо хоногтой харьцуулахад 400 төгрөгөөр нэмэгдсэн үнэ юм бол хонины цул мах 220 төгрөгөөр өсчээ.

Махны үнэ яагаад нэмэгдсээр байгаа болохыг худалдаа эрхлэгчдээс тодруулбал “Махны нийлүүлэлт буурснаас үнэ нэмэгдэж байна” гэдгийг хэлж байлаа. Хэдийгээр махны үнэ нэмэгдсээр байгаа ч монголчуудын хүнсний гол хэрэглээ болсон махны худалдан авалт төдийлөн буураагүй, энэ хавар нөөцийн мах эрт худалдаанд гарахгүй бол махны үнэ нэлээд өсөх байх гэдгийг ч тэд онцолж байсан.

Учир нь өвөлжилт хүндэрч, зуд болох магадлалтай гэдгийг дээр дооргүй хэлж, малчид ч намар эрт хотоо шингэлсэн нь энэ хаврын махны үнэд нөлөөлөх гол нөхцөл болж байгаа аж.   

Гурил, будааны үнэ ч өнгөрсөн оны мөн үеийнхтэй харьцуулахад кг тутамдаа 50-80 төгрөгөөр нэмэгджээ. “Алтан тариа” савласан нэг кг дээд гурил 1200-1500 төгрөг, нэгдүгээр гурил 1000-1300 төгрөг, хоёрдугаар гурил 780-1000 төгрөг байна. Харин задгайгаар буюу шуудайгаар худалдаж буй нэг кг дээд гурилын үнэ 1150-1300 төгрөгийн үнэ ханштай байна.

Уг нь шатахууны үнэ хот, хөдөөгүй буурч байгаа энэ үед өргөн хэрэглээний бараа бүтээгдэхүүний үнэ буурахгүй байгаад иргэд гомдоллож байна.

Үнэндээ шатахууны үнийн сургаар өсдөг барааны үнийг холбогдох албаныхан нь “хазаарлаж” чаддаггүй нь нууц биш. Тэгвэл шатахууны үнэ буурч байгаа энэ үед үнэ өсгөхгүй байх арга хэмжээг аваасай гэдгийг иргэд хүсч байна. 

Дэлхийн бусад оронд түүхий эдийн гол бүтээгдэхүүний үнээс хараат байдаг өргөн хэрэглээний барааны үнэ, тарифаа тусгайлсан хуулиар зохицуулдаг байна. Гэтэл манайд үнэ, тарифийг зохицуулах хууль, журамгүйгээс болж савлуур шиг л савлаж, хэн дуртай нь үнийг дураараа өсгөдөг жишиг тогтоод уджээ.

24tsag.mn