Засгийн газраас санаачилсан “Сайн хувьцаа” хөтөлбөр хэрэгжиж эхэлсэн эхний өдөр буюу 6-р сарын 13-нд хүсэлтээ өгсөн иргэдийн эхний ээлжийн 100 мянган төгрөг өнөөдрөөс хувийн дансанд нь байршиж, иргэд хувьцааны мөнгөө Арилжааны банкуудаас авч эхэлжээ.

Тодруулбал “Эрдэнэс Тавантолгой” компанийн хувьцаагаа худалдах хүсэлтээ долоо хоногийн өмнө буюу 6 дугаар сарын 13-нд гаргасан хүмүүс өнөөдөр мөнгөө авч байгаа юм. Харин долоо хоногийн мягмар гаригт хүсэлт өгсөн иргэдийнх дараа долоо хоногийн тэр өдрөө олгогдох аж. Энэ мэтээр иргэд хэд дэх өдөр хүсэлтээ өгсөн, дараа долоо хоногийн тэр өдрөө хувьцааны мөнгөө авахаар зохицуулалт хийжээ. Түүнчлэн дараагийн ээлжийн зуун мянган төгрөгийг ирэх долоо хоногийн мөн өдрүүдэд үргэлжүүлэн өгөх ба гуравдахь ээлжийн зуун мянган төгрөгийг Улсын их баяр наадмын өмнө өгч дуусах юм байна. Харин хувьцаагаа худалдах хүсэлтээ гаргаагүй  иргэд өнөөдөр ч хүсэлтээ гаргаж өгөхөд оройтохгүй бөгөөд амралтын өдрүүдэд арилжааны банкууд хагас цагаар ажиллаж байгаа аж. Түүнчлэн Тавантолгойн төсөл хөдөлж, хувьцааны ханш өсөх үед, иргэд хувьцаагаа анхны нэрлэсэн үнээр улсаас худалдан авах эрх нь нээлттэй хэвээр байгаа юм. 2012 онд Монгол Улсын Засгийн газраас “Эрдэнэс Тавантолгой” компанийн нэгж хувьцааны дүйцүүлсэн үнийг тогтоож иргэд брокерийн компаниар дамжуулан хувьцаагаа эзэмшиж эхэлсэн билээ. Гэвч өнгөрсөн хугацаанд 1072 ширхэг хувьцаа эдийн засгийн ямар нэг эргэлтэд ороогүйгээгээс иргэдийн дунд уг хувьцааг нэрлэсэн үнэд хүрэхүйц үнэ цэнэтэй эсэхэд эргэлзэж эхэлсэн. Энэхүү нөхцөл байдлаас үүдэн “Эрдэнэс Тавантолгой” компанийг  хувийн компани авахаар завдаж байсныг зарим хэвлэлээр мэдээллэж байсан юм. Улмаар “Сайн хувьцаа” хөтөлбөрийг хэрэгжүүлж эхэлснээр иргэд хувьцааны ач холбогдлыг мэдэж, эдийн засгийн бодит  үр дүн хүртэж эхэллээ гэдгийг албаныхан хэлж байна.

Засгийн газар иргэдээс хувьцаа худалдан авч, эдийн засагт шинээр 300-400 гаруй тэрбум төгрөгийн нийлүүлэлт хийхээр хүлээгдэж байна. Энэ нь эдийн засагт хэрхэн нөлөөлөх вэ.

Тухайлбал,

-Иргэдээр дамжиж эдийн засагт мөнгөний нийлүүлэлт хийгдсэнээр агшилт бүхий худалдаа, үйлчилгээний салбарын идэвхжил, өсөлтөд эерэг нөлөөлөл бий болно. Худалдаа, үйлчилгээний салбарын идэвхжил сайжрахтай уялдан эдийн засгийн өсөлтөд эерэг нөлөөллүүд бий болно.

-Монголын эдийн засагт дотоод эрэлт хумигдсантай холбоотойгоор өрхийн хэрэглээ 2016 оны 1 дүгээр улиралд өмнөх оны мөн үеэс -1.6 хувиар буурсан байгаа бол эдийн засагт мөнгөний нийлүүлэлт нэмэгдсэнээр өрхийн буюу хувийн хэрэглээ өснө. Өрхийн хэрэглээний өсөлтөөр дамжиж эдийн засгийн өсөлтөд эерэг нөлөөлөл бий болно.

-Эдийн засагт мөнгөний нийлүүлэлт нэмэгдэх нь худалдаа, үйлчилгээний салбарын өсөлтөд эергээр нөлөөлж, тус салбарын болон бичил, жижиг, дунд бизнес эрхлэгчдийн үйл ажиллагаа, эдгээр салбарт ажилладаг компаниудын ажлын байр, ажил эрхлэлтэд бодитой дэмжлэг үзүүлнэ. Ингэснээр ажилгүйдэл өсөх эрсдэлийг бууруулж, ажил эрхлэлтийг тогтвортой хадгалахад дэм болох зэрэг ач холбогдолтой юм.

Н.ЖАРГАЛ