Дэлхийн бөхийн нэгдсэн холбоо “Рио”-гийн олимпод Монголын чөлөөт бөхийн хоёр дасгалжуулагчийг зүй бус авир гаргасан хэмээн үзэж, Монголын Чөлөөт Бөхийн Холбоог 50 мянган еврогоор торгож, хоёр дасгалжуулагчийн эрхийг гурван жилээр хасах шийдвэрийг гаргажээ.  "Рио 2016" олимпийн наадмын чөлөөт бөхийн 65 кг-ийн жинд барилдсан МУГТ Г.Мандахнарангийн хувьд хүрэл медалийн төлөө өрсөлдсөн ч сүүлийн 6 секундэд өрсөлдөгчдөө боломж олголгүй зугтсан гэх үндэслэлээр хожигдсон. Г.Мандахнарангийн дасгалжуулагч Ц.Цогтбаяр, Б.Баяраа нар шүүгчдийн шийдвэрийг эсэргүүцэж дэвжээн дээр хувцсаа тайлж шидсэн нь дахин нэг онооны торгуулийг авчирсан билээ. Тэдний энэхүү үйлдэлд хариуцлага тооцох ёстой гэж  МЧБХ-оос мэдэгдсэн. Мөн  Монголын чөлөөт бөхийн холбоо тус хоёр дасгалжуулагчийн дотоодын болоод олон улсын тэмцээн, чөлөөт бөхтэй холбоотой ямар нэгэн үйл ажиллагаанд оролцох эрхийг нь жил гаруй хугацаанд хассан билээ.

Тэгвэл дэлхийн бөхийн нэгдсэн холбоо асуудлыг дахин хэлэлцсэнээр дээрх шийдвэрийг гаргасан тухай мэдээлэл цацагдаж эхлээд байна. Монголын чөлөөт бөхийн холбоо торгуулийн 50 мянган еврог төлбөл тамирчид олон улсын тэмцээнд оролцох боломжтой аж.

24tsag.mn