Гэмт хэрэгт холбогдож, дуулиан тариад байсан эрхмүүд “Цагдан хорих төв”-д наадамлана. Ингээд дуулиан шуугиантайгаар хоригдсон ямар эрхмүүд хорих ангид “наадамлах” гэж байгаа талаар өгүүлье.
Цагдаагийн экс дарга нар
Долдугаар сарын нэгний хэрэгт буруутгагдаад буй цагдаагийн экс дарга нар өнгөрсөн сарын 7-нд Сүхбаатар дүүргийн шүүхээс ял сонссон. Тэднийг Эрүүгийн хуулийн тусгай ангийн 274 дүгээр зүйлийн 274.2, 294 дүгээр зүйлийн 294.2 дахь хэсэгт зааснаар цэргийн албаны эсрэг гэмт хэрэг үйлдсэн, эрх мэдлээ урвуулан ашиглах, хэтрүүлэх, хэрэгжүүлэхгүй байх гэсэн үндэслэлээр буруутган ялласан билээ. Ингэснээр ЦЕГ-ын даргын үүрэг гүйцэтгэгч, хошууч генерал Ч.Амарболдод 6.6 жил, Эргүүл хамгаалалтын газрын дарга асан, цагдаагийн хурандаа Ш.Батсүхэд мөн 6,6 жил, Нийслэлийн цагдаагийн газрын дарга асан, хурандаа О.Зоригт 5,6 жил, Нийслэлийн цагдаагийн газрын Хэв журмын хэлтсийн дарга асан, хурандаа Г.Ганбаатарт хоёр жилийн ялыг жирийн дэглэмтэй хорих ангид биечлэн эдлүүлэхээр болсон. Харин “Өршөөлийн үзүүлэх хууль”-д хамруулсанаар Ч.Амарболд, Ш.Батсүх нар 3.6, О.Зоригт 2.6 жилийг хорих ялыг биечлэн эдлүүлэхээр шийдвэрлэж, НЦГ-ын Хэв журмын хэлтсийн дарга асан, цагдаагийн дэд хурандаа Г.Ганбаатар оноосон хоёр жилийн ялыг өршөөлийн хуульд хамруулан суллагдсан. Говьсүмбэр аймгийн Засаг дарга Ж.Баянмөнх
Албан тушаалаа урвуулан ашигласан, авлига авсан хэмээн Говьсүмбэр аймгийн Засаг дарга Ж.Баянмөнхөд Баянзүрх дүүргийн шүүхээс 5.1 жилийн ял оноосон. Түүнийг Говьсүмбэр аймгийн Татварын хэлтсийн даргаар ажиллаж байсан С.Мөнхжаргалаас хоёр сая төгрөгийн авлига авсан хэмээн 5.1 жилийн ял оноосон юм. Харин Шивээговь сум дахь орон нутгийн өмчит “Илчлэг шивээ” үйлдвэрийн газрыг өөрийн дотнын найздаа хувьчлахын тулд Өмч хувьчлалын комисс болон удирдлагадаа байгаа албан тушаалтнуудад хууль бус шаардлага тавьж, дарамталсан гэх үндэслэлээр буруутгаж байсан ч мөрдөн байцаалтын явцад тогдоогдоогүй билээ. Тиймээс Нийслэлийн шүүхээс анхан шатнаас оноосон 5.1 жилийн хорих ялыг 2.6 жил болгон хөнгөрүүлсэн юм. Увс аймгийн Засаг дарга Э.Цасчихэр
Увс аймгийн Засаг дарга Э.Цасчихэр, ИТХ-ын дарга Д.Батсайхан нарт Хан-Уул дүүргийн шүүхээс төсвийн мөнгө шамшигдуулсан хэмээн 2-3 жилийн хорих ял оноосон.
Э.Цасчихэрийг Увс аймагт барихаар төлөвлөсөн Нарийны голын 325 км, Тээлийн голын зам, гүүрийн барилгын ажлыг өөрийн “Мөнхжим” компаниар гүйцэтгүүлэхээр 710 сая төгрөг завшсан, төрийн албан хаагчдын таван давхар орон сууцыг дөрвөн давхар болгон барьсан гэх иргэдийн мэдээллээр АТГ-т шалгаж, Эрүүгийн хуулийн 263 дугаар зүйлд заасан төрийн албан тушаалтан албан тушаал эрх мэдлээ хэтрүүлж, онц их хэмжээний хохирол учруулсан гэсэн үндэслэлээр ялласан юм.
АМГ-ын дарга асан Д.Батхуяг
Ашигт малтмалын газрын дарга асан Д.Батхуягийг өнгөрсөн тавдугаар сарын 7-ноос сэжигтнээр тооцон Төв аймгийн урьдчилан хорих төвд саатуулсан билээ. Түүнийг өнгөрсөн оны сүүлээр Эрүүгийн байцаан шийтгэх хуулийн 264 дүгээр зүйлийн хоёр дахь хэсэг буюу төрийн албан тушаалтан эрх мэдлээ хэтрүүлсэн гэх үндэслэлээр хэрэгт татан шалгаж байсан ч прокурорын хяналтын шатанд хэрэгсэхгүй болгож байсан юм. Мөн Ашигт малтмалын газрын дарга байхдаа 43 тусгай зөвшөөрлийг хууль бусаар сэргээсэн, "Гол мөрний урсац бүрэлдэх эх, усан сан бүхий хамгаалалтын бүс, ойн сан бүхий газар, ашигт малтмал хайх, ашиглахыг хориглох тухай хууль" хэрэгжиж, ашигт малтмалын хайгуулын болон тусгай зөвшөөрөл олгохыг тодорхой хугацаагаар хориглосон журам гарсан үед эрх мэдлээ ашиглан 192 зөвшөөрөл олгосон гэх хэрэгт шалгаж байв. Уг хэргүүдийг сэргээсэн учраас ийнхүү шалган, цагдан хорьсон билээ.
Б.Чимэг
