Хэдэн сарын өмнөөс “Монгол ёс, монгол ёсолгоо” гэсэн далд реклам цацагдаж хүмүүс үүнийг олон янзаар тайларлаж байсан. Зарим нь ямар нэг архины сурталчилгаа гэж байсан бол зарим нь ийм нэртэй нэвтрүүлэг гарах нь хэмээн тааж байв. Харин энэ нь Улсын баяр наадамд зориулсан сценар байсан гэдгийг хүмүүс сүүлд мэдсэн юм. Ерөнхийлөгч Ц.Элбэгдоржийн хүсэлтээр эрдэмтдийн бүхэл бүтэн баг ажиллаж монгол ёс, монгол ёсолгооны талаар судалгаа хийжээ. Европчууд шиг гар барин мэндчилэх болсон өнөө үед монголчууд өөрсдийн ёс уламжлалаа сэргээх ёстой гэж үзсэн нь энэ наадмын нэгэн шинэлэг санаа байлаа. Ерөнхийлөгч Ц.Элбэгдорж Цагаан сараар, “Алтан дарь овоо”-ны тахилгын үеэр, Улсын баяр наадмын нээлтээр алгаа дэлгэн монгол ёсолгоо хийсэн нь олон нийтийн санаанд ихэд нийцэв. Наадмын нээлтэнд оролцсон урлагийнхан ч мөн ийн ёсолсон нь монголчуудад нэгийг бодогдуулж байлаа.
     Харин олон сар хэвлэлээр цацагдаж, урлагийн алдартнууд сурталчилгаанд нь тоглосон монгол ёсолгооны цаад утга нь 2013 оны сонгуультай холбоотой гэж тайлбарлах хүн цөөнгүй байна. Ерөнхийлөгч Ц.Элбэгдорж Монголоороо бахархдаг гэдгээ харуулах гэж ийнхүү мөнгө хөрөнгө, хүн хүч зарж буй гэх нь байна. Өмнө нь тэрбээр “Архигүй Монголын төлөө” гэх зэрэг олон нийтэд хандсан цөөнгүй уриалга гаргасан. Түүний санаачилсан монгол ёсолгоо иргэдэд ихээхэн таалагдаж байгаа тул цаашид ч аливаа арга хэмжээний үеэр “Ерөнхийлөгчийн санаачилсан” гэж дурдагдах нь лавтай. Ямартаа ч Монгол улсын ерөнхийлөгч Ц.Элбэгдорж шинэ имижтэй боллоо. Тэр шинэ имиж нь цаашид монгол түмнийг нэгтгэсэн ёслол хүндлэл болох болтугай.