Улс төрч эрхмүүдийн уясан хүлэг энэ жил одтой сайхан уралдлаа. УИХ-ын гишүүн, “Ажнай” корпорацийн захирал Д.Бат-Эрдэнийн Ембүү халзан азарга наадмын түрүү магнай боллоо. Мөн УИХ-ын гишүүн асан Г.Батхүүгийн Соёмбо зээрд айргийн гуравт хурдлав. Энэ мэт улс төрч эрхмүүдийн чансааг харуулсан шандаст хүлгүүд олон байлаа. Харин энэ жилийн бөхийн барилдаанд улс  төрчдийн ивээн тэтгэж, захыг нь мушгисан залуу сайхан бөхчүүд шинэ цолонд хүрлээ. Бөхийн тааварт нэр нь байгаагүй хэрнээ бяртай сайн бөхчүүдийг давж наадмын ногоон дэвжээнд нэг арслан, нэг гарьд, нэг харцага, дөрвөн начин цолтон төрсөн.

     Тэр дунд мэхтэй сайхан барилдаж харцага цолонд хүрсэн Төмөрбаатарын Санчир бол УИХ-ын дэд дарга асан Г.Батхүүгийн бөх юм. Өвөрхангай аймгийн Хархорин сумын уугуул түүнийг нутгийн ах нь ивээн тэтгэдэг бөгөөд “АПУ" ХХК-ны нэрийн өмнөөс барилддаг. Энэ жил ч Улсын баяр наадамд нутаг ус, "АПУ" компаний нэрийг гаргаж шинэхэн харцага боллоо. Харин шинэ начин Б.Пүрэвсайхан нь Ховд аймгийн уг гарвалтай бөгөөд түүнийг мөн л нутаг нэгт УИХ-ын гишүүн С.Бямбацогт ивээн тэтгэж, өөрийн компаний нэрээр барилдуулдаг юм. Тэрбээр Ховд аймгийн Чандмань сумын харьяат бөгөөд Ховд дэвжээний бөх. Мөн УИХ-ын гишүүн С.Бямбацогтын “Нью прогресс” компаний нэрээр дэвжээнд дэвдэг бөх юм.

   Ийнхүү УИХ-ын гишүүн асан Г.Батхүү өөрөө дахин УИХ-д сонгогдож чадаагүй, тойрог нь маргаантай байгаа ч Улсын баяр наадамд хурдан морь, шинжсэн бөх нь урамтай сайн байсан тул ихэд сэтгэл хангалуун байгаа аж. Харин бөх нь начин цолтой болсон С.Бямбацогт гишүүн дараа жил хурдан адуу сойхоор бодож эхэлсэн сурагтай.