Зуны дэлгэр цагт хотол түмнээрээ цэнгэн нааддаг Монгол үндэсний их баяр наадам налгар сайхан боллоо. Зарцуулж буй зардал, наадаж буй хөөр баяр нь эн тэнцүү байдаг ч наадмын дараа намар ойрхон тул халаасны хэдээ тоолох хүн олон байна. Гэр бүл, найз нөхдөөрөө баярлах гэсэн хүмүүс мөнгөө хайрлаад байдаггүй тул наадам дагаж олон юмны үнэ өсчээ.

Наадмын өмнө инфляци өссөн нь
   Баяр наадмын өмнө инфляци өнгөрсөн саруудынхтай харьцуулахад 0,5 хувь, оны эхнээс 9,7 хувь өссөн талаар Үндэсний статистикийн хорооноос мэдээлсэн юм. Сонгуулийн дуулиан, наадмын шуугианд дарагдаад энэ мэдээллийг иргэд төдийлөн ойшоосонгүй. Хүнс, ундаа, ус зэрэг өргөн хэрэглээний хүнсний барааны үнэ 0,5 хувь, орон сууц, ус, цахилгаан, түлшний үнэ 1,3 хувиар нэмэгдсэн байв.

Төв цэнгэлдэх хүрээлэнгийн эргэн тойронд
   Улаанбаатар хотын захирагчийн алба энэ жил наадмын талбай дахь  наймаачдыг цөөлнө, зөвхөн зөвшөөрөл авсан хэдэн хуушуурын асар байна гэж удаа дараа мэдээлж байсан. Гэтэл дахиад л хяналт тавьж чадсангүй. Төв цэнгэлдэхийг эргэн тойронд тоглоомоор бизнес эрхлэгчид, гутал засвар, барааны лангуу, хүнсний худалдаа цөм байлаа. Бүгд чанаргүй бүтээгдэхүүнээ өндөр үнээр зарахыг бодно. Эдгээрийн үнэ ердийнхөөсөө илүү үнээр зарагдаж байсан юм. Мөн Үндэсний соёл амралтын хүрээлэнгээс Төв цэнгэлдэх хүрээлэн орох замд оймс, гутал, зайрмаг, ундаа, шорлог, хуушуур, тамхийг хог новшин дунд худалдаж байлаа. Яг л өмнөх жилүүд шиг.

 Наадмын хуушуур
    Энэ жил Баяр наадмыг зохион байгуулах хорооноос Төв цэнгэлдэх хүрээлэнгийн орчимд нийтийн хоолны үйлчилгээ эрхлэх 500-600 аж ахуйн нэгжид зөвшөөрөл олгосон. Харин Хүй долоо худагт хуушуурын 160, явуулын хүнсний худалдааны 100 цэг ажиллав. Гэхдээ Төв цэнгэлдэх хүрээлэнгийн орчимд ажилласан нийтийн хоолны газрууд хүрэлцээ муутай байсан тул зарим нь цаг гаруй дугаарлаж байж хуушуур олж идсэн тухай ярьж байлаа. Наадмын хуушуур өнгөрсөн жил 500-600 төгрөг байсан бол энэ жил 800 төгрөгөөс эхэлсэн. Гэвч төд удалгүй 1200 төгрөгийн үнэтэй болов. Харин айрагны хувьд нэг литр нь 4000 төгрөгний үнэтэй байсан ч наадамчин олон мөнгөнд төдийлөн гар татсангүй. Мөн наадмаар ёс юм шиг үнэ нь тэнгэрт хаддаг амьд хонь 220 мянга, ямаа 130 мянга болж өссөн юм.

  Хүй долоон худагт морины уралдаантай зэрэгцэн морь унуулдаг бизнес энэ жил ч ашигтай ажил хэвээр байв. Хөдөө орон нутгаас ирсэн хүмүүс хүүхэд залууст морь унуулж 100 км хүрэхгүй газар явуулаад л 1500 төгрөг нэхэж байв. Төрөл бүрийн наймаа эрхэлдэг худалдаачид энд ирж жижиглэнгийн бараанд үнэ нэмэн зарж байсан юм. Наадмын маргааш нэгэнт ирсэн тул үнээ өсгөсөн наймаачдад хяналт тавьж, халаасны хэдээ зохицуулах цаг иржээ.