Өнгөрсөн оны долдугаар сарын 27-нд Солонгосын Кёнгиду, Куангжүши, Кунгжиам хэмээх газар үерийн улмаас нэг гэр бүлийн гишүүн хоёр Монгол бүсгүй нас барсан харамсалтай хэрэг гарч байсан билээ.
    Өнгөрсөн оны долдугаар сарын 27-нд Солонгосын Кёнгиду, Куангжүши, Кунгжиам хэмээх газар үерийн улмаас нэг гэр бүлийн гишүүн хоёр Монгол бүсгүй нас барсан харамсалтай хэрэг гарч байсан билээ. Тэд хөрш айлын Солонгос  эмгэнд туслах гэж байгаад амиа алдсан байдаг. Тодруулбал, үерт автсан солонгос эмгэн хөрш айлын Монгол бүсгүйчүүд болох Уугангоо, 2,4 настай хоёр хүүхдийн ээж, гурван сартай жирэмсэн байсан Даваа нараас тусламж хүссэн байдаг.
    Тэд хамтран эмгэний гэрийн ард байгаа шуудууг бөглөсөн хавтанг авах гэж байгаад уулнаас урсан орж ирсэн их усанд автан амиа алдсан юм. Тэдний цогцосыг тус бүр 1,3 км зайтай газраас олсон билээ. Тухайн үедээ Монгол бүсгүйчүүдийг сайн үйлс бүтээн амиа алдсан талаар хэвлэл мэдээллээр ихээхэн бичиж, тэдний ар гэрийнхэнд нөхөн төлбөр багагүй хэмжээгээр оногдох тухай хэлэлцэгдэж байсан. Гэвч жил гаруй хугацаа өнгөрсөн ч хэн нэгний амь нас, эд хөрөнгийг өөрийн биеэр хамгаалан амиа алдсан иргэнд оногддог нөхөн төлбөр Монгол бүсгүйчүүдийн ар гэрийнхэнд оногдох нь битгий хэл тэднийг эмгэний амь нас,  хөрөнгө болсон байрыг усанд автахаас хамгаалахаар явж байгаад амиа алдсан нь батлагдаагүй хэмээн үзжээ.
    Эмгэн мөрдөн байцаалтын явцад “Би эхлээд бөглөрсөн шуудууны ус гэр рүү урсаад ороод ирэнгүүт талийгаач Уугангоо охиныг дуудаад бөглөөг нь аваад өгөөч гэж гуйсан. Тэр ганцаараа ирээд дийлэхгүй болохоор гэртээ байсан талийгаач Даваа эгчийгээ дуудан авчирч тэд шуудуунаас бөглөөс болсон зүйлүүдийг гаргаж байсан. Гэхдээ хэсэг хугацааны дараа харахад  тэр хоёр гэрлүүгээ явж байгаа харагдсан. Замдаа гэнэт урсан орж ирсэн усанд автсан байж магадгүй” хэмээн мэдүүлжээ.
    Харин эмгэний мэдүүлгийг Уугангоогийн солонгос аав Ким Тэ Хи “Эмгэн өөрөөс нь болж, хүний амь нас эрсдэж, улмаар нөхөн төлбөр төлөх вий хэмээн айснаасаа худлаа мэдүүлэг өгч байна” хэмээн үзэж байгаа аж.
Мөн “Бид энэхүү нөхөн төлбөрийг авч өөрсдөдөө хэрэглэх бус харин сайн санааны үйлсэд бүгдийг нь хандивлахыг хүссэн. Харин бусдын төлөө алтан амиа золиослосон иргэдэд ингэж хандах юм бол цаашдаа хэн сайн үйлсэд сэтгэл гарган оролцох билээ” гэжээ.
    Харин талийгаач Даваагийн нөхөр, Америкийн иргэн Солонгос үндэстэн Уилльям Пак эхнэрээ амиа алдсанаас хойш хоёр хүүхдээ Монголд байдаг эхнэрийнхээ аав ээж дээр орхин хувийн амьдралаа хөөн одсон бөгөөд одоо огт сураггүй байгаа аж.
    Хуулиндаа Солонгос улс нь хэн нэгний амь нас, эд хөрөнгийг өөрийн амь насаараа хамгаалан амиа алдсан гадаад , дотоодын иргэдэд яг адилханаар нь улсаас нөхөн төлбөрийг албан ёсоор олгодог журамтай. Амиа алдагсдын сарын цалингийн дунджийг 240 дахин их хувиар бодож нэг удаа нөхөн төлбөрийг ар гэрийнхэнд нь оногдуулахаас гадна дахин түүний нэр дээр дээрх мөнгөний  40~100 хувийг нэмж олгодог юм байна.