Ардчилсан намын дарга Н.Алтанхуяг өнгөрсөн 6 дугаар сард төрөлх Увс аймгийнхаа төв Улаангомд сонгогчидтой уулзахдаа дараах үгийг хэлжээ.
    -Хэрвээ энэ удаагийн сонгуульд Ардчилсан нам олонх болбол Ю.Цэдэнбал, Ж.Батмөнхөөс хойш 22 жилийн дараа Увс нутгийн хүү ерөнхий сайд болно.
Ардын намын хоёр буюу Ч.Хүрэлбаатар, Б.Чойжилсүрэн нар сурсан аргаараа мөнгөө тарааж аймгаасаа УИХ-д сонгогдсон ч улсын хэмжээнд хамгийн олон суудлыг АН авч чадлаа. Унаган нутгийнхандаа хэлсэн Н.Алтанхуягийн үг биелэж,  Монгол улсын 27 дахь ерөнхий сайдаар 1958 оны 1 сарын 20-нд Увс аймгийн Улаангом хотод төрсөн 54 настай энэ эр томилогдох нь тодорхой боллоо. Өмнө нь тэрээр 2009 оны 10 сарын 28-нд ерөнхий сайд С.Баяр өвчний улмаас үүрэгт ажлаа хүлээлгэн өгсний дараа ерөнхий сайдын үүрэг гүйцэтгэгчээр 1 хоног ажилласан байдаг юм.

     Улс төрд ойрхон, Увс нутгийн бас нэгэн хүү facebook хуудсандаа ингэж бичжээ: “Сүүлийн гурван жил дараалан нутгийн хүү улсын наадмын түрүү авлаа. Ерөнхий сайд мөн ойрадын хүү болох нь. Төрийн тэргүүн, улсын ерөнхийлөгч мөн ойрад монгол. Нутгийн тэнгэр ивээж, Монголын заяа түшиг!”
     Үнэхээр ч Пүрэвийн Бүрэнтөгсийг 25 насныхаа ид хавыг гайхуулан төрийн наадмын түрүүг авчихаад есөн хөлт цагаан тугаа тойрч байхад цэнгэлдэхэд хурсан нутгийнхан нь “Увс нуур” дуугаа хангинуулан түрлэг өргөж байлаа. Тэрээр Увс аймгийн Давст сумаас анх 1981 онд Мядагийн Мөнгөн арслан цол хүртсэнээс хойш 21 жилийн дараа төрсөн арслан цолтон юм. (Давст бол Ю.Цэдэнбалын төрсөн сум.)
    Ердөө хориодхон хоногийн дараа долоон жилийн өмнө Увсын Тэсээс Улаанбаатарт нүүж ирсэн Р.Сайнжаргал гуайн хүү С.Ням-Очир Лондоны олимпоос Монголын анхны медалийг энгэртээ гялалзуулав.

    Самбо бөхийн дэлхийн таван удаагийн аварга Г.Жамсран, Самбо бөхийн дэлхийн залуучуудын хошой аварга Г.Баатарсүрэн, ОУХМ Г.Барсүрэн, Г.Дамдинсүрэн, жүдо бөхийн ОУХМ Д.Нямхүү, Улсын начин, олон улсын хэмжээний мастер Д.Жавзанжамъян нарын ойрын хамаатан энэ залуу олимпийн медалийн салхийг хагалах учиртай байжээ. Тэс бол олимпийн медальтан ихэрлүүлсэн Монголын ганц сум болж байна. 1968 оны Мехикогийн олимпоос Увс аймгийн Тэс сумын харьяат, гавъяат тамирчин, улсын начин Т.Артаг хүрэл медаль хүртэж байсан юм.
     Ийнхүү сонгууль, наадам, олимп гээд оны онцлох үйл явдалд Увсын цэнхэр хязгаарынхны од нь гийсэн өдрүүд үргэлжилсээр. Талбайн хоймрын цагаан ордонд Лу.Гантөмөр, М.Сономпил зэрэг Увсын хүүхдүүд сайд болох тухай нэр бас дуулдаж байна.