Олимпийн наадам үргэлжилж байна. Монголын тамирчид медаль хүртэх нь хүртэж, шигшээд үлдэх нь үлдлээ. Харин хамгийн их найдвар тавьж байсан нэг гэр бүлийн тамирчин Х.Цагаанбаатар, О.Гүндэгмаа нар медалийн үзүүрээс атгаж чадалгүй дөрвөн жил хүлээсэн олимпийг орхих боллоо. Хөдөлмөрийн баатар гэр бүлээс хос биш юм аа гэхэд ганц шар алтан медаль хүлээж байсан монголчууд баахан сэтгэл дундуур үлдэв.

   Лондонгийн олимп бол Х.Цагаанбаатарын гурав дахь, О.Гүндэгмаагийн тав дахь олимп. Х.Цагаанбаатар бол өөрийнхөө жинд дэлхийд чансаагаараа дээгүүрт ордог бөх. Түүнийг Бээжингийн олимпод аз дутсан гэж өмөөрсөн монголчууд энэ жил ч лавтай нэг юм дуулгана хэмээн хүлээж байлаа. Х.Цагаанбаатар эхний тойрогтоо хийлж, хоёр дахь тойрогтоо Тайваний бөхийг цэвэр ялсан нь зурагтаа чагнан хүлээж байсан хүмүүсийг суудлаас нь өндөлзүүлсэн. Харин дараагийн тойрогт эзэн орны тамирчинтай зодоглож, харамсалтайгаар ялагдсан. Афины олимпоос анх хүрэл медаль авсан ч ийнхүү гурав дахь олимпдоо оролцоод Монголын тугийг мандуулж чадсангүй. Уг нь тэрбээр Лондонд очоод “Гадны тамирчид бэлтгэл их сайтай байгаа нь харагдаж байна. Алаад өгнө өө” гэж твиттер хуудасдаа бичин монголчуудын цөсийг хөөргөж байлаа.

   Харин түүний гэргий О.Гүндэгмаа 1996 оноос хойш Монгол улсыг төлөөлөн тав дахь олимпдоо оролцож байгаа. Бээжингийн олимпиос анхны мөнгөн медалийг авчирч, медалийн буухиаг эхлүүлж байсныг олон хүн санаж байгаа байх. Түүний амжилтаар бахархсан монголчууд нэг хэсэгтээ бэлэг сэлт барьж гүйсэн дээ. “Буу нь гацаагүй бол алтны үзүүрээс атгах байсан” гэж түүний чадварыг үнэлж байв. Гэтэл энэ удаад шигшээд шалгарч чадсангүй. Түүнийг өмнөө 14 тамирчин оруулж шигшээд шалгарч чадаагүйг сонсоод “Дэлхийд чансаа дээгүүр байдаг ч чухам яагаад олимпийн наадамд од муутай оролцдог юм бол?” гэж олон хүн санаа алдаж байлаа. Гэхдээ түүний дасгалжуулагч “Афины олимпод О.Гүндэгмааг заавал медаль авах ёстой гэж байсан нь түүнд сэтгэлийн дарамт авчирсан” гэж байсан. Монголчуудын энэ их итгэл арай буруугаар эргээгүй байгаа?

   Ямартаа ч тэд дөрвөн жил бэлдэж, олимпод оролцож, ахин дахин туршлага хуримтлууллаа. Гэхдээ ирэх олимп гэж бий. Бээжингийн олимпоос медальгүй ирсэн Х.Цагаанбаатарыг Лондонгийн олимпод яаж зоригжуулсан шигээ тэдний дараагийн наадамд амжилт хүсье.