Энэ 2018 онд Улаанбаатар хотод гадаадын зээл тусламж, нийслэлийн төсөв, нийслэлийн авто замын сан, улсын төсөв, орон нутгийн хөгжлийн сангийн санхүүжилтээр гэсэн 5 эх үүсвэрээр нийт 63 төсөл, арга хэмжээ хэрэгжүүлж, нийт 43.5 км авто зам, 3050 урт метр гүүр  барина. Мөн нийслэлийн замын сангийн хөрөнгөөр 24 төсөл арга хэмжээг хэрэгжүүлэх аж. Түүнчлэн гадны хөнгөлөлттэй зээлийн хүрээнд дөрвөн гүүрийн бүтээн байгуулалтын ажил хийгдэнэ. Эдгээр ажил нь энэ сарын 5-15-ны хооронд эхлэх аж. Сонсголон, Туулын гүүрийн ажил дөрөвдүгээр сарын 5-наас эхлэх бол Яармагийн замын ажлыг энэ оны 11 дүгээр сарын 30-нд дуусгах юм байна. Замын цагдаагийн уулзварын өмнөх гүүрэн гарцын ажлыг дөрөвдүгээр сарын 15-нд эхлүүлэхээр төлөвлөөд байгаа бөгөөд үүнтэй холбогдуулан долоон байршилд түр зам гаргсан. Харин голлох бүтээн байгуулалтаар Олимпийн гудамжийг хааж,  “Home Plaza”-гаас эхлэн барьж буй гүүрэн гарц юм.

 Уг гүүрэн гарцын бүтээн байгуулалтттай холбоотойгоор долоон чиглэлд түр зам нээж байгаагаас хамгийн гол гарц нь төмөр зам дээгүүрх гарц юм. Энэ замын хөдөлгөөнийг баасан, бямба, ням гарагуудад хааж, аюулгүй байдлын шаардлага хангасан гарцаа бий болгож хөдөлгөөнийг хэвийн болгосон байна. Туул гол, Дунд голоос өмнөх хэсгээс хотын төв рүү ордог энэ хэсгийг нээхэд хөдөлгөөн хэвийн болж байгаа талаар албаныхан ч хэлж байв. Харин ч түр зам нээсэн нь урьд өмнөхөөсөө илүү ачаалал багатай, түгжрэлгүй болжээ. Учир нь төмөр замын гарам даваад “home plaza”-г тойрч дөрвөн талаас уулздаг. Харин үүнийг “Баянмонгол” хорооллын зүүн талын “Саруул” хотхоны арын нүхэн гарцтай холбогдсон замаар тусгаарлах зурвас тавьж, Нарны замд гурваас дөрвөн газарт буцаж эргэх гарцуудыг нээгээд байгаа аж. Энэ нь Home Plaza-г тойрч Баянмонгол хороолол ордог учир хамгийн их түгжрэлтэй цэг энд байдаг байсан бол түр замын ачаар өнөөдөр Баянмонголынхон гэртээ түгжрэлгүй харьж,хамгийн өндөр ачаалалтай хэсгийн түгжрэл буурчээ. Учир нь шинэ түр зам тойруу чиглэлээс шулуун чиглэлтэй болсон учир давуу тал болсон. Яг ийм байдлаар бусад түр замууд ч мөн түгжрэлийг сааруулахад гол үүрэг гүйцэтгэж байна.

Тухайлбал, паркаас төв цэнгэлдэх хүрээлэн болон гүүрэн гарцны эхлэлээс Хүннү хороолол хүртэлх, Төв цэнгэлдэхээс Удирдлагын академи хүртэлх түр замууд тойруу чиглэлээс шулуун чиглэлд шилжсэн учраас ид ачаалалтай үеийн түгжрэлийг урьдынхаас бууруулах таатай нөхцөл бүрдсэн байна. Иймд цаашид түр зам болгож ашиглалтад оруулсан замуудаа бүр зам болгох нь илүү үр дүнтэй арга биш үү. Гүүрэн гарц ашиглалтад орсон ч эдгээр замуудаа бүр замаар тогтвол тун өгөөжтэй байж магадгүй юм.

Тэртээ тэргүй л замын нягтралыг бууруулах зорилгоор нээсэн түр замууд учир үүнийгээ цаашид түр зам гэлгүй замын хөдөлгөөнөө үргэлжлүүлэх нь оновчтой шийдвэр байж болох тал бий.

“Замын цагдаагийн газрын ойролцоо гүүрэн гарц барих төсөл”-ийн ажилтай холбогдуулан дараах долоон түр замыг гаргасан юм.

-Махатма Гандигийн гудамжийг нарны замтай холбох 0.41км түр зам

-Махатма Гандигийн гудамж-нийслэл хүрээ өргөн чөлөө-Хүннү 222 хорооллын хойд талын авто замтай холбох 0.7км түр зам

-Рапид харш хорооллын авто замыг нийслэл хүрээ өргөн чөлөөтэй холбох 15у/м түр зам

-Махатма Гандигийн гудамж–нийслэл хүрээ өргөн чөлөөний авто замтай холбох 0.53км түр зам

-Нийслэл хүрээ өргөн чөлөө-Удирдлагын академийн хойд талын авто замтай холбох 0.32км түр зам

-Хүннүгийн гудамж–Саруул хотхон–Соёолжийн гүүр 0.32км авто зам

-Авто замчдын гудамжийг Сэлбэ гол дээгүүр 13-р хорооллын замтай холбох 0.14км авто зам