Өнгөрсөн амралтын өдрүүдэд буюу наймдугаар сарын 25-26-ны хооронд БНСУ-д болсон 60 сая төгрөгийн шагналын сантай Ой тогтоолтын аварга шалгаруулах нээлттэй тэмцээн амжилттай болж өндөрлөлөө. Тус тэмцээнд есөн орны нийт 200 орчим тамирчин ой тогтоолтын 10 төрлөөр бага, өсвөр, насанд хүрэгчдийн ангилалд хоёр өдрийн турш оюунаараа өрсөлдсөн юм.

Манай улсыг төлөөлж Монголын оюун ухааны академийн 18 тамирчин ОУ-ын шүүгч, дасгалжуулагч Б.Баасандоржийн удирдлага дор амжилттай оролцон 25 алт, 28 мөнгө, 19 хүрэл медаль буюу нийт 90 медалийн 72 медалийг хүртэж үнэмлэхүй ялалтыг байгуулсан байна.

Мөн манай тамирчид бага, өсвөр, насанд хүрэгчдийн ангилалдаа дэлхийн есөн дээд амжилтыг шинэчлэн тогтоосноос гадна нийлбэр дүнгээр илүүрхэж нас насны ангилал тус бүртээ эхний гурван байрт оржээ.

Насанд хүрэгчдийн ангилалд:

1-р байр: ОУ-ын Их Мастер Н.Мөнхшүр 7766 оноо

2-р байр: ОУ-ын Их Мастер Н.Энхшүр 6949 оноо

3-р байр: ОУ-ын Их Мастер Э.Пүрэвжав 6222 оноо

Өсвөр нас:

1-р байр: ОУ-ын Их Мастер Э.Лхагвадулам 7382 оноо

2-р байр: Б.Лхагвадорж 5784 оноо

3-р байр: Г.Мянганбаяр 4927 оноо

Бага нас:

1-р байр: О.Ганжигүүр 3147 оноо

2-р байр: Д.Мөнхтүшиг 2739 оноо

3-р байр: Б.Эрмүүнболд 2362 оноо тус тус эзэлсэн байна.

Тус тэмцээний 10 төрлийн дараах нийлбэр оноогоор 2017 оны Дэлхийн аварга, Геннисийн рекорд эзэмшигч, Олон Улсын Их Мастер Н.Мөнхшүр (7766 оноо) тэргүүлж аваргын цом хүртжээ.

Ингээд бид Америк, Швед, Хятад, Турк, Филиппин, Энэтхэг, Тайван, Малайз, Англи, Сингапур,Солонгос гэх мэт олон арван улсад оюуны спортын 50 дахь тэмцээндээ амжилттай оролцож нийт 861 медаль хүртэн дэлхийн дээд амжилтуудыг шинэчлэн тогтоосоор байна.

С.Нацаг