Өнөөдрийн УИХ-ын чуулганаар Ерөнхий сайд Н.Алтанхуяг Засгийн газрын бүтэц, бүрэлдэхүүнийг танилцуулсан. Уг бүтцийг УИХ-ын чуулганаар дэмжсэн билээ. Харин МАН-аас уг бүтцийг дэмжээгүй юм. Энэ талаар МАН-ын бүлгийн дарга Н.Энхболдоос тодрууллаа.

- Засгийн газрын бүтцийг яагаад дэмжсэнгүй вэ?
- Засгийн газрын бүтцийн тухай, Засгийн газрын бүрэлдэхүүний тухай, Засгийн газрын тухай хуульд өөрчлөлт оруулах тухай хуулийн төслүүд болон “Төрийн захиргааны байгууллагын тогтолцоо, бүтцийн ерөнхий бүдүүвчийг батлах тухай” УИХ-ын тогтоолтой танилцсан. Тэгээд Засгийн газрыг хэт нүсэр бүтэц, зохион байгуулалттай байхаар тусгасан хуулийн төслүүд нь дутуу боловсруулагдаж асуудлын нэг мөр, цогцоор нь шийдвэрлээгүй хуулийн давхардал, зөрчил үүсгэсэн. Мөн төрийн бодлогын уялдаа холбоо, цогц нэгдмэл байдал алдагдсан. Тиймээс УИХ-аар хэлэлцүүлэх шаардлагатай гэж үзсэн.

- Жишээлбэл?
- МУ-ын Засгийн газрын тухай хуульд өөрчлөлт оруулах тухай хуулийн төсөлд Ерөнхий сайд, Засгийн газрын зарим гишүүдийн эрхлэх асуудлын хүрээг бүрхэг, ойлгомжгүй томъёолон давхардал үүсгэсэн. Мөн Засгийн газрын бүтэц, бүрэлдэхүүний тухай хуулийн төсөлд Засгийн газрыг 16 яам, 19 сайдтай байхаар тусгасан нь гүйцэтгэх засаглалыг хэт нүсэр бүтэц зохион байгуулалттай болгож, үр ашиггүй зардал, орон тоог нэмэгдүүлэх нөхцлийг бүрдүүлсэн, улс төрийн бүлэглэлүүдийг явцуу эрх ашигт нийцүүлэн “бялуу хуваах” зарчмыг барьжээ гэж үзэж байна. Түүнчлэн хувийн хэвшил, бизнесийн салбартай шууд харьцдаг агентлагуудыг татан буулгаж, чиг үүргийг яамдуудад шилжүүлсэн нь төрөөс хувийн хэвшил, аж ахуйн үйл ажиллагаанд шууд оролцож чөлөөт зах зээл, шударга өрсөлдөөний зарчмыг алдагдуулах сөрөг үр дагавартай гэх мэт олон асуудал байна.