Жил бүр манай оронд уламжлал болгон зохион байгууллагддаг “KHAAN QUEST” сургууль 10 дах жилдээ амжилттай зохион байгуулагдаж байна.Энэ жил тус сургуульд Их Британи Умард Ириландын нэгдсэн Вант Улс, БНЭУ, БНСУ, Япон, Канад, Австрали, ХБНГУ, Франц, Сингапур зэрэг 12 орны 1000 гаруй цэргийн алба хаагчид оролцож штабын дадлага, хээрийн сургалт дадлага, эмнэлэг хүмүүнлэгийн тусламж, хээрийн нөхцөлд эмнэлгийн анхан шатны тусламж үзүүлэх сургалт, цэргийн барилга инженерийн туршлага солилцох сургалт зэрэг үндсэн таван арга хэмжээг хэрэгжүүлж байгаа бөгөөд ОХУ, БНХАУ-ын ажиглагчид оролцож байна.
Урьд жилүүдэд явагдсан сургуульд агуулга, ач холбогдол, хамрах цар хүрээний хувьд үр өгөөжтэй болсоор ирсэн нь дараа дараагийн сургуулийг зохион байгуулах үндсийг бүрдүүлж байдаг юм.
Энэхүү сургууль нь уламжлал болон явагдах болсноор сургуулиас сургууль хүртлэх жилийн хугацаанд олон улс, бүс нутагт үүссэн энхийг дэмжих ажиллагааны цагийн байдал, хямрал зөрчил, түүний илрэх, өрнөх шинж байдал, тулгамдаж буй бэрхшээлтэй асуудлууд тэдгээрээс гарч байгаа үр дагавар зэрэг олон хүчин зүйлд цэргийн онолчид, судлаачдын хийсэн дүн шинжилгээ, түүнээс гарах сургамж, дүгнэлтэд тулгуурлан шийдвэрлэх арга замыг эрэлхийлж, энхийг сахиулагчдын ажиллагааны арга техикүүдийг илүү боловсронгуй болгоход чиглэгдэн үүрэг гүйцэтгэх нөхцөл байдалд нь уялдуулж байдгаараа өндөр ач холбогдолтой сургууль юм.
“Khaan Quest 2012” сургууль нь сургуульд оролцогч орнуудын цэргийн алба хаагчдыг энхийг дэмжих ажиллагаанд бэлтгэх үндсэн зорилготойгоор явагдаж байгаа бөгөөд хууль бус зэвсэгт этгээдүүд, хэт даврагч бүлэглэлүүдийн энхийг сахиулагчид, эвслийн цэргийн хүчин, энгийн номхон ард иргэдийн эсрэг халдлага, хорлон сүйтгэх ажиллагаанд өргөн ашиглаж хор хөнөөл учруулж байгаа гар хийцийн тэсрэх төхөөрөмжийг илрүүлэх, устгах, аюулгүй болгох арга ажиллагаанд суралцуулахаар төлөвлөсөнөөрөө ихээхэн онцлогтой болж байна.
“Khaan Quest” Энхийг дэмжих ажиллагааны олон улсын сургууль нь энхийг сахиулагчдын мэргэжлийн болон цэргийн хэргийн ур чадварыг нэмэгдүүлэх, энхийг дэмжих ажиллагааны арга, ажиллагаанд суралцах, бие бялдар-сэтгэл зүйн бэлтгэлээ дээшлүүлэхэд их хувь нэмэр болдог давуу талтай сургууль юм.
