Хүнс, хөдөө аж ахуй, хөнгөн үйлдвэрийн яамнаас хэрэгжүүлж буй "Ноолуур" хөтөлбөрийн 2019 оны төлөвлөгөө, үр дүнгийн талаарх үйл ажиллагаанд оролцогч талуудын зөвлөлдөх уулзалт өчигдөр боллоо.

Уг хөтөлбөр нь Монгол Улсын Засгийн газрын 2018 оны 47 дугаар тогтоолоор батлагдсан "Ноолуур" хөтөлбөр ноолуурын бүрэн боловсруулалтын түвшинг 60 хувьд хүргэж, байгаль орчинд ээлтэй эцсийн бүтээгдэхүүний үйлдвэрлэл, экспортыг нэмэгдүүлж, ноолууран бүтээгдэхүүний олон улсад өрсөлдөх чадварыг дээшлүүлэх зорилготой юм.

Үүний тулд эцсийн бүтээгдэхүүн үйлдвэрлэгч аж ахуйн нэгжид татвар, санхүүгийн оновчтой дэмжлэг үзүүлснээр түүхий эдийн бүрэн боловсруулалтын түвшинг 60 хувьд хүргэж, ээрмэл утас үйлдвэрлэлийг 3-3.5 дахин өсгөх, ажлын байр тогтвортой хадгалах, 3600 гаруй ажлын байр шинээр бий болох, эцсийн бүтээгдэхүүний үйлдвэрлэл, экспортыг 2-3 дахин нэмэгдүүлэх боломжтой гэж талууд үзжээ.

Тус хөтөлбөрийн хүрээнд Хүнс, хөдөө аж ахуй, хөнгөн үйлдвэрийн яам, Хөгжлийн банктай хийсэн гэрээний дагуу өнгөрсөн онд ноолуурын 20 үйлдвэрт 188.2 тэрбум төгрөгийн зээлийг эргэлтийн хөрөнгийн зориулалтаар олгожээ. Зээлд хамрагдсан үйлдвэрүүдийн ноолуур бэлтгэлийн хэмжээг өмнөх онтой харьцуулахад түүхий ноолуур 584.2 тонн буюу 1.3 дахин, самнасан ноолуур 124.9 тонн буюу 1.6 дахин өссөн байна. Мөн самнах үйлдвэрлэлийн хүчин чадал 33.8 хувь, ээрэх үйлдвэрлэлийнх 28.6 хувь, сүлжих үйлдвэрлэлийнх 42.7 хувиар тус тус өсч, 1544 ажлын байр шинээр нэмэгдсэн аж.

Түүнчлэн 2018 оны нийт экспортын хэмжээг өмнөх онтой харьцуулахад 18.2 хувиар өсч, харин боловсруулалтын түвшингээр задалвал угаасан ноолуур 2.3 хувиар буурч, самнасан ноолуур 8.45 хувь, ээрмэл утас 140 хувь буюу гурав дахин, бэлэн бүтээгдэхүүн 8.5 хувиар өссөн үзүүлэлт гарчээ.