Дорноговь аймаг байгуулагдсаны түүхт 94 жил, говийн тавдугаар дүрийн ноён хутагт Лувсанданзанравжаагийн мэндэлсний 222 жилийн ойн баяр наадмын барилдаанд Улсын цолтой олон бөх зодоглохоор бүртгүүлжээ. Тэднийг улсын арслан Ц.Содномдорж, Э.Оюунболд, Р.Пүрэвдагва нар манлайлж байна. 

Харьж яваа Ц.Содномдорж, Р.Пүрэвдагва яахав гэхэд ид иртэй, цолоо ахиулна гэж зүтгэх, олны хүлээлтийн эзэд болсон улсын арслан Ц.Бямба-Отгон, улсын харцага Б.Зоригтбаатар, О.Мөнх-Эрдэнэ зэрэг харцагууд "цол олгох" барилдаан дээр юу хайж явна вэ. Үнэхээр "гал маналзтал" барилдмаар байсан бол "Увсын 100" жил рүү жолоо залах боломж байгаагүй юу.

Тэнд улсын арслан цолтнууд эзгүй байна. Бөхчүүд өөрсдөө "мөн чанар"-ынхаа эсрэг алхаж, олон түмэнд хар сэр төрүүлж байгаа нь иймэрхүү зүйлс дээр л тод томруун харагдаж байгаа шүү дээ. Алгасах зүйлээ алгасаж байж л хор тайлагддаг нь гажих аргагүй үнэн. 

Тэгээд ч сум, аймгийн наадамд өндөр цолтон очихын цаана үнэн хүчийг үзэхээс илүү нутгаараа нийлж байгаад нэг бөхийг дээш гаргаж ирэх тактик, тавын даваанд хэвтэж өгөх төлөвлөгөө л зонхилдог биш үү. Үүний үр дагавар бол гагц цол авах, авахгүй тухай асуудал биш гэдгийг эрх биш бөхчүүд гадарлаж байгаа биз. Эцсийн дүндээ улсын цолтны дээгүүр дэвэх залуу бөхчүүд гарцаагүй гарч ирж буй.