“Өдрийн сонин”-ы 2012 оны 8-р сарын 06-ны өдрийн №186 дугаарт БНХАУ-ын засгийн газраас өгч буй 500 сая долларын хөнгөлттэй зээлийн нэг хэсгээр хэрэгжих нээлттэй тендерийг Нийслэлийн авто замын газраас нийтэд зарлажээ. Энэхүү тендерийн ажил нь нийслэл Улаанбаатар хотод баригдах зургаан ширхэг давхар замын ажил бөгөөд тендертэй холбоотой мэдээллийг Хотын захиргаанаас авах тухай ч заасан байна. Гэвч энэхүү тендерт оролцох хүсэлтэй компаниудын материалыг хүлээн авахгүй байгаа аж. Учир нь тус тендерийн ажлыг гүйцэтгэх Хятад улсын гурван компани хэдийн тодорсон тухай мэдэгджээ.
 Энэхүү гурван компаний зөвхөн нэг нь зам гүүрийн мэргэжлийн харин нөгөө хоёр нь барилга болон төмөр замын чиглэлийн компаниуд аж. Саяхан ажлаа өгөөд буй МАН-ын Засгийн газрын үед шийдэгдсэн уг тендерийн эзэд, тендер зарлагдахаас өмнө тодорсон байсан тухай эх сурвалжууд хэлжээ. Нээлттэй тендерийн зарчмыг зөрчиж буй тус тендерийг Нийслэлийн авто замын газар хаалттай тендерээр шалгаруулах ёстой байсан аж. Гэтэл хэвлэл мэдээллийн хэрэгслээр зарлан олон нийтийг төөрөгдүүлж буй нь гайхалтай. Сая гаруй хүнтэй хотын шүдний өвчин болоод байгаа замын түгжрэлийг хөнгөлөх энэ тендер Монголд хэдийнээ цэцэглэсэн тендер наймаалагчдын халаасанд орж, нөгөө л авилгын уршгаар үр дүнтэй ажил болж чадахгүй үлдэх бий гэсэн болгоомжлол төрж байгаа юм. Нийслэлийн өдөр тутмын ажил амьдралтай салшгүй холбоо бүхий уг тендерийн ажлын явцыг шинэ Засгийн газар болон Нийслэлийн засаг дарга бөгөөд Улаанбаатар хотын захирагч Э.Бат-Үүл дарга эргэн харж анхаарал хандуулахад илүүдэхгүй болов уу.