УИХ-ын гишүүн О.Баасанхүү Үндсэн хуулийн нэмэлт, өөрчлөлтийн талаар мэдээлэл хийлээ. Тэрбээр шоронгоос айсан хэсэг бүлэг нөхөд Үндсэн хуулийг өөрчлөх гэж байна. Та бүхэн мэднэ. Үндсэн хуулийн нэмэлт, өөрчлөлтийг 62 гишүүн дэмжиж, өргөн барьсан. Үүнд миний бие оролцсон. Гэтэл байнгын хорооны хуралдаанаар долоохон гишүүн зөвшөөрсөн. Мөн нэг гишүүн зарчмын зөрүүтэй гэдэг зүйл оруулж ирсэн. Өөрөөр хэлбэл, 62 гишүүний өргөн барьж байсан хуулийн төсөл танигдахааргүй болж. Ийм зүйлээ төлбөр төлж, маш сайн сурталчилж байна. УИХ-ын дарга рекламны модель боллоо. Үүнд харамсаж байна. Нөгөөтэйгүүр, Үндсэн хуульд нэмэлт, өөрчлөлт оруулахдаа ард түмнээс асуух ёстой. Тэр дундаа ард түмнээс заавал асуух ёстой таван асуулт байна. Үүнд хариулт авч байж, Үндсэн хуулийг өөрчлөх эсэхийг шийдэх ёстой. Тиймээс Ерөнхийлөгч, Ерөнхий сайд, Их хурлын дарга зэрэг хүмүүст бичиг хүргүүлсэн. Үүнд, УИХ-ын нэр бүхий 62 гишүүний өргөн барьсан хуулийн төсөл яагаал өөрчлөгдөв, юуны учир гэдгийг тодруулах юм. өөрөөр хэлбэл, 62 гишүүний санал бодлоо нэгтгэсэн зүйлийг хэн гэдэг гишүүн зарчмын зөрүүтэй гэдэг шалтгаанаар 60 хувийг өөрчлөх гэж байна вэ. Бусдыг лоббидов уу, эсвэл нөлөөлөв үү. Тиймээс ард түмнээс асуух ёстой.

Үүнд,

1. УИХ-ын гишүүдийн тоог 99 болгож нэмэх нь зөв үү, буруу юу. Түүврийн аргаар 3000 иргэнээс санал асуухад 2000 гаруй нь эсэргүүцсэн. Тиймээс заавал асуух ёстой.
2. Гишүүдийн бүрэн эрхийн хугацааг 5 жил болгох тухайг бас асуух ёстой.
3. Сонгуулийни тогтолцоог холимог байх эсэх. Тэр дундаа Ерөнхий сайд л давхар дээлтэй байна гэсэн. Өөрөөр хэлбэл, Ерөнхий сайд хүн намын дарга байна. Намын дарга нь жагсаалтаа бичнэ гэдэг байдлаар шууд дэвшиж байна. Тиймээс холимог уу, эсвэл жагсаалтынх уу гэдгийг асуух нь зүйтэй.
4. Байгалийн баялаг ард түмнийх үү, эсвэл нийтийн өмч байх эсэх нь чухал биш. Харин байгалийн баялагын сан байгуулъя. Энэ сангаар дамжуулж, аливааг төсөл хөтөлбөрийг санхүүжүүлэх тухай ярьсан. Тэгвэл сан байгуулах нь зөв үү гэдгийг асуух хэрэгтэй.
5. Сүүлийнх нь шүүх засаглал. Засаглалын гурван хэлбэр байдаг. Энэ гурван засаглал нэг нэгнийхээ эрх мэдлийг гүйцэтгэж болохгүй. Хууль тогтоогчид давхар дээл гэдэг зүйлээр гүйцэтгэх эрх мэдлийг авсан бол одоо шүүх эрх мэдлийг авах гэж байна. Өөрөөр хэлбэл, Шүүхийн ерөнхий зөвлөлийг Ерөнхийлөгчийн дэргэд аваачих гэж байна. Тиймээс шүүх хараат бус байх ёстой юу. Эсвэл Ерөнхийлөгчийн дэргэд байх ёстой юу гэдгийг асууя.

Энэ асуултад хариулт авч байж Үндсэн хуульд нэмэлт өөрчлөлт оруулах эсэхийг шийдэх ёстой гэлээ.