Үндэсний их баяр наадмын дараа үргэлж үхрийн баас шиг уван цуван ирдэг зүйл бол допингийн хариу. Өнөөдөр Үндэсний бөхийн салбар хорооны дарга Д.Давааням гэгч "тамирчны нэр хүнд" ярьж байгаад л өнөө хэдийгээ золигт гаргалаа. Допинг илэрсэн нэг бөхтэй бүр ашиглаж байгаа утасны дугаарыг нь мэдэхгүй болохоор холбогдож чадаагүй гэх утгатай зүйл ярьж, нэрийг нь зарласангүй. Техник технологи хөгжсөн XXI зуунд хүнтэй холбоо барьж чадаагүй гээд сууж байгаа хүн салбар хороо удирдлаа юу. Ямар бөх болоод нэрийг нь хав дарав, тэр бөх нь даяан хийгээд л алга болчихдоггүй юм бол холбогдох шиг амархан зүйл баймааргүй сэн. Энэ мэт ямар ч туйлбаргүй, тодорхойгүй түмэн асуултыг нийгэмд шидэж өгчхөөд л мэдэгдэл хийсэн нэр зүүгээд дуусгав. 

Улсын гарьд Б.Гончигдамбыг бүр хүн ч гэж хялайж харсангүй. Хариу нь эцэслэгдээгүй гэчхээд л шууд зарлачихлаа. Тухайн бөхөд нэр хүнд гэж байхгүй болж таарлаа. Допинг илэрсэн бөхтэй холбогдож чадаагүй гээд зарлаагүй байж, Хэнтий аймгийн арслан Н.Баяржаргалын нэрийг ч зарлахгүй байхгүй яав. Ер нь шуугианыг намжаая гэсэн зорилгоор л өнөөдрийн хэвлэлийн хурлыг хийх шиг болов. Даанч туг тахина гэдэг нь энэ бололтой.  

Монголын Үндэсний бөхийн холбоо ч бас допингийн асуудалд тодорхой байр сууринаас хандах хэрэгтэй. Бөхчүүдийнхээ эрх ашгийг хамгаалж зогсдог холбоо байх хэрэгтэй. Түүнээс биш ямбыг үүрэх болохоор бүхний түрүүн гарч ирж, ялыг нь үүрэх болохоор хойшоо суудаг байж болохгүй.

Үндэсний бөхийн салбар хороо, Монголын допингийн эсрэг байгууллага ажлаа мэдэхгүй, хуулиа хэрэгжүүлэхгүй, цаас барьж нууц хадгалсан, хүний хүүгийн нэрийг золигт гаргасан л байгууллага бололтой. Одоо байгаа удирдлагууд нь ажлаа дүрмийн дагуу хийж чадахгүй бол чаддаг нэгнийг нь томилдог төр бай. Үндэсний бөхийн салбар хорооны дарга Д.Давааням өнөөдөр "эрх" ярьж байгаад тодорхой болоогүй зүйлийг орон даяар зарласандаа хариуцлага хүлээх үү. 

М.Гал