Өчигдөр буюу пүрэв гарагт Үндэсний их баяр наадмын бөхийн барилдаанд 4, түүнээс дээш давсан 32 бөхөөс авсан допингийн шинжилгээний хариуг Монголын допингийн эсрэг байгууллагаас танилцуусан. Тэдний хэлснээр нийт гурван бөхийн хариу асуудалтай гарсны нэгийг нь буюу Улсын гарди Б.Гончигдамбын хариуг дахин нягтлах шаардлагатай байгаа аж. Мөн илэрсэн гэгдэж буй өөр нэг бөхийн хариуг өөрт нь мэдээлээгүй учир олон нийтэд зарлах боломжгүй гэнэ. Үүнтэй холбогдуулан спортын тайлбарлагч Ө.Шижирбат ийн ярив. 

Тэрбээр, "Өнөөдөр Монада Наадмын комисс хэвлэлийн хурал хийж Б.Гончигдамба, Н.Баяржаргал гэсэн хоёр нэр хэллээ. Үр дүнгийн удирдлагын эхний шат болох тамирчинд мэдэгдэх үе шат дууссан тул энэ 2 бөхөд мэдэгдсэний дараа олон нийтэд зарлаж байна гэдгээ хэллээ. 3 дахь бөхийн нэрийг одоогоор хэлэх боломжгүй байна, утсаа авахгүй байна гэнэ. 

Үндэсний бөхөөс гадна их спортын төрлүүдэд шинжилгээ өгсөн тамирчин анкет бөглөхдөө утасны дугаар гэрийн хаяг мэйл хаягаа зайлшгүй бичдэг дүрэмтэй. Утсаа авахгүй байгаа бөхийн мэйл хаяг руу нь илгээсэн гэдгээ хэллээ бас. Мэйл рүү бичээд л болоо шүү дээ, тухайн тамирчинд мэйлээр мэдэгдсэн гэсэн үг. Бусад орнуудад мэйлээр хариуг нь явуулдаг. Мэйлээр мэдэгдэж үр дүнгийн удирдлагын ажиллагааг хийсэн учраас дүрмийн дагуу олон нийтэд мэдэгдэж болно. 

Монада ажлаа мэдэхгүй, мэргэжлийн бус хүмүүс учраас алдаа гаргасаар ирсэн. Өнөөдөр бас л алдаа гаргаад л 2 бөхийн нэрийг зарлачхаад, 3 дахь бөхөөс допинг илэрсэн гэхдээ одоогоор өөрт нь мэдэгдэж чадахгүй байна гэнэ, мэйлээр мэдэгдчихээд байгаа гэдгээ мэдэхгүй л манаргаж явна даа чааваас. Энэ бөх хэн бэ гэдэг таавар таалгасаар байх юмгүй болчихсон, бөхийн хүрээнд аль хэдийн тарчихсан. Улс төр ороод дуусахуу яах уу гэдгийг анхааралтай ажиглаж байна даа… Өмнө нь ч хэлсэн. Дахиад хэлэхэд Дрездений лабортори ВАДА руугаа тайлангаа дүрмийн дагуу явуулдаг шүү!!!" гэлээ.

Л.Баяр