Үндэсний баяр наадмыг зохион байгуулах комиссын ээлжит хуралдаан болж хэд хэдэн асуудлыг хэлэлцэж, шийдвэр гаргав. Хэлэлцсэн асуудал гэхээсээ түүгээр ярьсан сэдвийн агуулга, тэндээс гарсан шийдвэр нийгмийг бүхэлд нь хамруулж хоёр хуваах шалтгаан болж байх шиг. Хоёр бөхөөс сэргээш илэрчээ. Уг асуудлыг олон нийтэд албан ёсоор зарлахаас өмнө ил болчихсон л сэдэв. Харин Зохион байгуулах хорооноос албан ёсоор зарлаж, хариуцлага тооцуулахаар шийдвэрлэсэнд асуудлын зангилаа оршиж байна. Сонирхолтой нь, Зохион байгуулах хорооноос гаргасан шийдвэр, олон нийтэд албан ёсоор зарласан мэдээллийн араас Үндэсний аюулгүй байдлын зөвлөл хуралдлаа.

Ерөнхийлөгч даргалж, УИХ-ын дарга, Ерөнхий сайд нар саналаа хэлдэг, цаашлаад шийдвэрт хүрдэг энэ зөвлөл Үндсэн хуулийн нэмэлт, өөрчлөлтийн хүрээнд хуралдсан гэх ч наадмын түрүү бөхөөс сэргээш илэрсэн асуудлыг давхар хөндөж, хэлэлцсэн тухай мэдээлэл түрүүчээсээ олон нийтийн сүлжээнд түгэж, эхнээсээ шүүмжлэлийн бай болох шинжтэй, өчигдрөөс.

Угтаа бол уул шугамандаа Үндэсний их баяр наадмын хүчит бөхийн барилдаанд шөвгөрсөн бөхчүүдээс сэргээш илэрсэн эсэх асуудлаар санал, дүгнэлтээ гаргах нь Зохион байгуулах хорооны үүрэг. Эцсийн шийдвэрийг Ерөнхийлөгч гаргадаг болохоос хөндлөнгийн хэн нэгний санал шүүмжлэлийн хүрээнд шийдэх асуудал биш.

Үнэн бол Үндэсний их баяр наадмын шөвгийн 16-д үлдсэн бөхчүүдээс сэргээш илэрсэн гэх бөхчүүдийн асуудлыг Аюулгүй байдлын гурван гишүүн хэлэлцэх болтлоо даамжирсны ард ямар шалтгаан, шалтаг байна вэ? гэдэг нь дахин асуулт хөврүүлж эхэлж байна. Тэр тусмаа “Эцэг хууль”-иа хэлэлцэж байгаа энэ цаг үед. Уг нь тусдаа салбар хороо байгуулж, түүндээ тодорхой хэмжээний мөнгө төсөвлөөгүй биш гэж үү.

Цаашлаад Зохион байгуулах хороо гэсэн тусдаа, тусгай чиг үүрэг хүлээсэн комисс байсаар атал тэр нь Ерөнхийлөгч, УИХ-ын дарга, Ерөнхий сайд нарыг хуралдуулах хүртэл хэмжээнд хүрсэн нь хачирхалтай.

Түүнээс илүү чухал асуудал, шийдвэрлэх ёстой, саналаа нэгтгэх учиртай асуудал энэ улс оронд байхгүй гэж үү. Үнэхээр сэргээш хэрэглэсэн гэх бөхчүүдийн асуудлаар Үндэсний аюулгүй байдлын зөвлөлийг бүрдүүлэгч Ерөнхийлөгч, УИХ-ын дарга, Ерөнхий сайд гурав ширээний ард суугаад хэлэлцэж, байр сууриа солилцсон бол “Бөх бол Төр” хэмээх үгийг А.Сүхбат гишүүн зүгээр ч нэг унагаагүй бололтой.

С.Сүлд