Засгийн газрыг шинээр эмхлэн байгуулах бүрт даргыг нь өөрчлөх “дүрэм”-тэй нэг агентлаг бий. Тэр нь Цагдаагийн ерөнхий газар. Хууль зүйн сайдын бүрэн эрхэд хамаардаг уг газрын дарга нарын томилгоо өнгөрсөн хугацаанд Засгийн газраасаа шууд хамааралтай явж ирсэн нь үүний илрэл. Х.Тэмүүжинг салбарын сайдаар очиход хошууч генерал Д.Сандаг-Очирыг чөлөөлж, Б.Билэгтийг томилж байв.

Харин Ч.Сайханбилэгийг Ерөнхий сайд болсны дараа Хууль сахиулахын их сургуулийн захирал, цагдаагийн хурандаа Р.Чингис уг албанд очиж байлаа.

Ж.Эрдэнэбатын Засгийн газар бүрдэхэд Р.Чингисийг үүрэгт ажлаас нь чөлөөлж, АТГ-ын Мөрдөн шалгах хэлтсийн даргаар Ө.Энхтөрийг томилсон байдаг.

Улмаар У.Хүрэлсүхийн Засгийн газар бүрдэж, сайд Ц.Нямдорж салбартаа эргэн ирэхэд Ө.Энхтөрийг ажлаас нь чөлөөлж Хууль сахиулахын их сургуулийн захирлаар ажиллаж байсан генерал С.Баатаржавыг томилсон. Өнгөрсөн хугацаанд У.Хүрэлсүхийн тэргүүлсэн Засгийн газар тогтвортой байж, бүр Ерөнхий сайд нь улиран ажиллахаар болсон энэ цаг үед Цагдаагийн ерөнхий газрын дарга тойрсон томилгоо хөндөгдөхгүй байх болов уу гэтэл үгүй байв. Байв гэдэг нь шалтгаантай.

Учир нь, Цагдаагийн ерөнхий газрын даргаар ажиллаж асан генерал С.Баатаржавыг албан тушаалд нь улираах бус бүр дэвшүүлэн Хууль зүй, дотоод хэргийн дэд сайд болгосон нь анхаарал татав.

С.Баатаржавын хувьд хуулийн салбар тэр дундаа цагдаад шинэ хүн биш. 1990 оноос Төв аймагт мөрдөн байцаагчаар ажлын гараагаа эхлүүлж, Сум дундын цагдаагийн тасгийн дарга, аймаг, нийслэлийн Цагдаагийн дарга, Улсын мөрдөн байцаах газрын дарга, ЦЕГ-ын Тэргүүн дэд дарга, дарга гээд түүний намтар бүхэлдээ энэ албатай холбогддог. Доороос нь дээш шатлан дэвших замаар өгсөж ирсэн түүний хувьд туршлагатай юу туршлагатай, эрхэлж ирсэн ажлаа сайн мэддэг үү мэднэ. Үүнтэй хэн ч маргахгүй.

Гагцхүү генерал С.Баатаржавыг эрхэлж байсан албан тушаалаас нь дэвшүүлж, зэрэг дэв нэмсэн нь цаанаа хэд хэдэн шалтгаантай байсан бололтой.

Нэгдүгээрт,  Х.Нямбаатар сайд болохоосоо өмнө Зөрчлийн тухай хуулийн шинэчилсэн найруулгыг өргөн барихаар бэлтгэл ажлаа хангаж эхэлснээ мэдэгдсэн. Уг шалтгаанаа "Намайг л Зөрчлийн тухай хуулийг санаачилсан. Ард түмнийг шулдаг гээд сөрөг мэдээлэл байдаг. Энэ бол 2015 онд намайг УИХ-ын гишүүн болохоос өмнө батлагдсан. Хожим нь би нэмэлт, өөрчлөлтийн ажлын хэсгийг ахалж, 2017 оны долдугаар сарын 1-нээс хойш үйлчилж байна. Жилд 1.2 сая хүн уг хуулиар торгууль, шийтгэл эдэлж байна. Хуулийн мөн чанар, агуулгыг ойлгоогүй шүүмжүүд байдаг. Хуульд засаж сайжруулах ч зүйлүүд бий. Зөрчлийн тухай хуулийг адлаж, шүүмжлэхээс илүүтэй нийтийн сайн сайхны төлөө албадлага хэрэгжүүлдэг хууль шүү гэдгийг ойлгохыг хүсэж байна" хэмээн тайлбарласан байдаг. 

УИХ-ын сонгуулийн өмнөхөн гишүүн Б.Пүрэвдорж "Зөрчлийн тухай хуулиар 1.4 сая иргэнийг 464 тэрбум төгрөгөөр торгосон байна. Монгол Улсын нэг иргэнд 140 мянган төгрөгийн торгууль ногдуулсан байна.

Ховд аймгийн Булган суманд 1600 орчим хүн нийтдээ хоёр сая төгрөгөөр торгуулсан байна. Хэрвээ торгуулийн мөнгийг төлөхгүй бол тэнсэн ялтай болдог. Ховдын Булган, Алтай сумаар тэнсэн ялтай хүн их байна. Тиймээс Зөрчлийн хуулиар хариуцлага хүлээхэд өршөөх хуулийн төслийг өргөн барьж байна" гэж байв.

Эндээс сайд Х.Нямбаатар, гишүүн Б.Пүрэвдорж нарын ээлж дараалан мэдэгдсэн тайлбар, хэвлэлийн бага хурлын хүрээнд Зөрчлийн тухай хуульд нэмэлт, өөрчлөлт оруулах эсэх нь цаг хугацааны асуудал гэдгийг тодорхой харж болохоор.

Хоёулаа УИХ-д улиран сонгогдож, нэг нь салбарын сайд болж дэвшсэн нь Зөрчлийн тухай хуульд "гар хүрэх", иргэдийн амьдралд илүү нийцүүлэх асуудлыг хөндөх магадлалыг илүү нэмэгдүүлсэн хэрэг. Харин Зөрчлийн хуульд оруулах нэмэлт, өөрчлөлтийг хийх Х.Нямбаатар сайдын сонирхлыг дэмжих, бодит амьдралд нийцүүлэхэд хэрэг болох хүн нь С.Баатаржав байсан бололтой. Нэг үгээр, иргэдийн өдөр тутмын асуудлыг шийдвэрлэхэд хамгийн үүрэг оролцоотой явдаг цагдаагийн албыг гарын арван хуруу шигээ мэдэх хүн нь С.Баатаржав болж таарав. 

Нэгэнтээ тэрбээр "Алба хаагч бүр өргөсөн тангарагтаа үнэнч, улс төр, бизнес, эрүүгийн бүлэглэлээс ангид байж, гагцхүү хуулийн хүрээнд шударгаар ажиллах ёстой.

Цагдаагийн байгууллагын нэр хүндийг өргөх, иргэд, олон нийтийн цагдаад итгэх итгэлийг нэмэгдүүлэхийн тулд алба хаагч бүр ухамсартай, хичээл, зүтгэл гаргаж, ёс зүйтэй, шударгаар ажиллах хэрэгтэй.

Ажлын үр дүн гаргадаггүй, албан тушаалтнууд өөрсдийн үйл ажиллагаандаа дүгнэлт хийх ёстой. Цаашид дарга нарын ажлыг дүгнэхдээ бодитой шалгуур үзүүлэлтээр, чадамж, ажил хариуцаж байгаа байдал, алба хаагчдынх нь болон хариуцаж буй нутаг дэвсгэрийн иргэд, олон нийтийн санал хүсэлтийг харгалзан үзэх бодлого чиглэл барина" хэмээж байсан генерал С.Баатаржав өдгөө Дэд сайдын хувиар хууль зүйн салбар тэр дундаа цагдаагийн байгууллагад шаардлага тавих нь. 

Г.Эрхэс