УИХ-ын гишүүн, ЗГХЭГ-ын дарга Л.Оюун-Эрдэнээр авторлагдсан түүхэн аялал жуулчлалын хэд хэдэн төсөл, дэд бүтцийн ажил Хэнтий аймагт эхлээд байна.

Өнгөрсөн 2019 онд Ерөнхий сайдын ивээл доор БОАЖЯ-наас “Түүхэн аялал жуулал-хөрөнгө оруулалт” үндэсний чуулганыг  Төрийн ордонд зохион байгуулж байв.

Төрийн болон төрийн бус байгууллагууд, аялал жуулчлалын мэргэжлийн холбоод, хувийн хэвшлийн аж ахуйн нэгжүүд, орон нутгийн төлөөлөл 800 гаруй хүн оролцсон чуулганы үеэр Хэнтийд хэрэгжиж буй томоохон төслүүдийг танилцуулж байлаа.

Улсын төсвийн хөрөнгө оруулалтаар Хэнтий аймгийн Биндэр суманд Их Монгол Улс, Монголын эзэнт гүрэн, Хэнтий аймгийн Батноров суманд Хүлэгбаатар Боорчи-Андлалын өргөө, Хэнтий аймгийн Норовлин суманд Шихихутаг нууц товчоо түүхэн аялал жуулчлалын цогцолборуудыг байгуулахаар ажлыг нь эхлүүлсэн. Аялал жуулчлалын салбарт анх удаа 38 сая ам.долларын хөнгөлөлттэй зээлээр Тогтвортой аялал жуулчлал төслийг хэрэгжүүлэхээр Азийн хөгжлийн банктай зээлийн хэлэлцээрийг байгуулсан. Тэрхүү төслийн хүрээнд Чингис хааны төрсөн нутаг Хэнтий аймгийн Дадал сумын нутагт Мянганы суут хүн-Их эзэн Чингис хаан төслийг, Хөвсгөл аймгийн Хатгал, Ханх сумдад Тогтвортой аялал жуулчлалыг хөгжүүлэх төслийг тус тус хэрэгжүүлэхээр болсныг салбар яамныхан дуулгаж байсан юм.

Мөн Засгийн газраас Хэнтий аймгийг түүхэн аялал жуулчлалын, Хөвсгөл аймгийг байгалийн аялал жуулчлалын, Нийслэл Улаанбаатар хотыг Соёлын аялал жуучлалын төвөөр зарлаж, цаашид төвийн, баруун, зүүн, хангайн, говийн болон Улаанбаатарын бүсүүдэд газарзүйн байрлал болоод аялал жуулчлалын нөөцийн онцлогт тулгуурласан аялал жуулчлалын бүсүүдийг хөгжүүлэх, үйлчилгээний чанарыг сайжруулах, дэд бүтцээр холбох чиглэлээр тодорхой ажлуудыг төлөвлөн хэрэгжүүлж эхэлсэн тухай Ерөнхий сайд дуулгаж байлаа.

Түүнчлэн энэ хүрээнд болоод төсвийн хөрөнгө оруулалтаар Хэнтий аймагт зам, барилга, дэд бүтцийн бусад олон ажил эхлээд байгаа юм.

Тэгвэл Хэнтий аймгийг төлөөлж УИХ-д удаа дараа сууж байсан, туршлагатай улстөрч Б.Гарамгайбаатар хэвлэлд хандаж дээрх асуудлаар байр сууриа илэрхийлжээ.

Тэрээр “Хэнтий аймаг түүхэн аялал жуулчлалын бүс нутаг мөн үү гэвэл мөн. Санал нэг байна. Тэр төслүүдийг би үзсэн. Сошиалаар хүмүүс үзэл бодлоо уралдуулж л байна. Гэхдээ цар тахлаас үүдсэн эдийн засгийн энэ хүнд цаг үед төсвөөс хөшөө дурсгалд хөрөнгө оруулалт хийж, үргүй цацаж байгаа нь ирээдүйд асар их хортой. Л.Оюун-Эрдэнэ өөрөө ярьсан байна лээ. Энэ төслийг эсэргүүцсэн хүн бол төрийн эсрэг гэмт хэрэгтэн гэж. Би тэгж бодохгүй байна. Иргэд санал бодлоо хэлэх ёстой. Тухайн хөшөө барьж буй газруудад түүх сонирхдог хүмүүс очдог болохоос жирийн аялагчид очдоггүй. Дэд бүтцийн асуудал түүхийгээрээ, техник эдийн засгийн үндэслэлүүд огт боловсрогдоогүй байна. Мөн Бэрх рүү тавьж буй хорин километр зам, тэр зуун километрийг дахиад хэдэн жил барих юм бэ?  Тэгэхээр тэр хөрөнгө оруулалтуудыг тодорхой хугацаанд зогсоох нь илүү зөв байх. Миний бас нэг үнэхээр эсэргүүцээд байгаа зүйл бол Чингис хааны төрсөн нутгийг Дадал, Дэлүүн болдог гэж тодорхойлоод цогцолбор барина гэсэн асуудал байна. Монголын түүхийг, Монголын нууц товчоог судалдаг олон улсын гадаад, дотоодын маш олон судлаач, эрдэмтэд өнөөдөр Чингис хааны төрсөн нутгийг яг Дадалын Дэлүүн болдог гэдэг дээр 100 хувь санал нэгдэж, чадаагүй байгаа. Жишээлбэл: Дэлгэрхаан, Хар зүрхний Хөх нуур гэх мэт  газрууд дээр цогцолбор эхэлж барьсан бол эдийн засгийн хувьд ашигтай байхыг үгүйсгэхгүй.

Түүнээс дэлхийн олон Монголч эрдэмтэд санал нэгдэж чадаагүй газарт хүчээр тулгалт хийж, социализмын үед Чингис хааны төрсөн нутаг энэ гээд хөшөө барьсантай утга ижил зүйл хийж байгаа нь буруу. Монголын нууц товчоон дээр бичигдсэн түүхэн баримт бичгүүдийг хүчээр зөрчин  элдэв хөшөө барьж байгуулж байгаа нь   жинхэнэ төрийн эсрэг гэмт хэрэг.   Түүнээс хөрөнгө мөнгөтэй нь холбоод хэлж байгаа хүмүүсийн үг бол төрийн эсрэг гэмт хэрэг биш. Түүхийг гуйвуулж байгаа нь бол жинхэнэ төрийн эсрэг гэмт хэрэг” гэжээ.

Б.Гарамгайбаатарын үгийг бодох л хэрэгтэй. Товчхондоо, улстөрч Б.Гарамгайбаатарын хэлсэнчлэн  Л.Оюун-Эрдэнийн Хэнтийд хэрэгжүүлж буй түүхэн аялал жуулчлалын төслүүд, дэд бүтцийн ажлуудыг зогсоож, улсынхаа түүхийг үнэнээр нь болгох уу гэдэг асуудал гарч ирлээ.