Ерөнхий сайд эрчим хүчний салбарын 2020-2021 оны өвөлжилтийн бэлтгэл ажлын явц, холбогдох байгууллагуудын ажилтай танилцлаа.

Энэ үеэр тэрбээр “Үндсэн хуулийн шинэ нэмэлт, өөрчлөлт хэрэгжиж эхэлсэн. Энэ өөрчлөлтийн хүрээнд Ерөнхий сайд өөрийн Засгийн газраа эмхлэн байгуулах эрхтэй болсон. Энэ хүрээнд шинэ Засгийн газар байгуулагдсан. Төр засаг тогтвортой цаашид үргэлжлэн явах ёстой гэж иргэд үзсэн гэж ойлгож байгаа. Засгийн газар хэвийн үйл ажиллагаагаараа хоёр дахь удаагаа ажиллаж байна. Энэ нь улс оронд маань хэрэгтэй гэдэг нь удахгүй харагдана.

Бидний хийх ажил тодорхой. Төрийн албан хаагчид аа, та бүхэн эх орондоо тангараг өргөсөн хүмүүс. Эзэн Чингис хааны байгуулсан тулгар төрийн төрийн алба хаагч нар. “Алсын хараа-2050” хөтөлбөр УИХ боловсруулсан. Бид ямар боломж бололцоог ашиглаж чадсангүй вэ, улс орны хөгжил цэцэглэлт ямар байгаа талаар үнэлэлт өгч, ирээдүйн 30 жилийн хөгжлийг тодорхойлсон. Энэ бол хөгжлийн баримт бичиг. Ингэснээр бид замын зурагтай болсон.

Энэ зурган дээр үндэслээд Монгол Улсын нийгэм, эдийн засгийг хөгжүүлэх таван жилийн хөтөлбөрийг баталсан. Ирэх дөрвөн жилд юу хийх нь эдгээр баримт бичигт тусгасан байгаа.

Ерөнхий сайдын хувьд улс орныхоо эдийн засаг, иргэдийнхээ ажил амьдралыг хурдан хөгжүүлэх юмсан гэж чин сэтгэлээсээ бодож байна. Сахилга хариуцлага, нэгдсэн бодлогогүйгээр олон жил явж ирсэн. Үүний үр дүнд улс орны хөгжил хойш татагдсан. Төр нь төр шиг, төрийн алба нь төрийн алба шиг биш. Салан задгай байж ирсэн. Мэргэжлийн байгууллагуудыг мэргэжлийн бус хүмүүс удирдсанаас болж ийм байдалд хүрсэн гэж ойлгож байгаа.

Тиймээс мэргэжлийн хүмүүсээр яам, тамгын газрыг удирдуулсан.

Бид хөгжлийн дэд бүтцүүдээ тавьж дуусгах ёстой. Үүний нэг нь эрчим хүч. Энэ бол манай улсын хөгжил дэвшлийн үндэс. Эрчим хүчгүй амьдрал гэж үгүй. Тиймээс энэ салбараа бэхжүүлэх, дотоодын хэрэгцээгээ бүрэн дүүрэн хангах нь бидний нэгдүгээр зорилт. Хоёрдугаарт, гаднаас нефть авдагаа болъё. Дотооддоо үйлдвэрлэе. Бид улс нефтийн арвин их нөөцтэй улс. Тиймээс өөрсдийн дотоод нөөц бололцоогоо дайчлая.

Гуравдугаарт, хүнсний асуудал байна. Бид элсэн чихэр, цагаан болон шар будаагаа дотооддоо хангаж чадахгүй байх. Бусад бүх боломж нь байна. Цаашлаад хүнс экспортолдог орон болохоор зорьж ажиллаж байна. Зах зээл нь хангалттай байна. Хөгжих асар их боломж байна. Үүний тулд боловсруулах байгууллагуудыг баръя.

Дөрөвдүгээрт, цемент. Тавдугаарт, гангийн үйлдвэртэй болох ёстой. Энэ асуудлыг бодлогоор дэмжих ёстой. Улмаар барилгын материалаа өөрсдөө үйлдвэрлэдэг болно. Цаашлаад барилга байгууламжийн үнэ буурна. Энэ бүхний төрийн албан хаагчид цогцоор нь боддог байх хэрэгтэй.

Дараагийн асуудал дэд бүтэц. Монголчууд төмөр замаа өөрсдөө барьж байна. Долдугаарт, мэдээлэл, технологийн холбооны салбар. Аль ч газраас төрийн болон банкны үйлчилгээг авдаг байх хэрэгтэй. Дээрх асуудлууд бол энэ улс орны суурь хөгжил байх ёстой.

Эхэлсэн ажлаа дуусгах хэрэгтэй байна алба хаагчид аа. Анхаарч ажиллаарай гэж хэлэхийг хүсэж байна. Эрчим хүчний салбарт дунд болон урт хугацаанд авч хэрэгжүүлэх мастер төлөвлөгөө боловсруулах шаардлагатай байна" гэлээ. 

А.Сүх