УИХ-ын чуулганы ээлжит хуралдаанаар Авлигын эсрэг хуульд өөрчлөлт оруулах хуулийн төслийн талаар хэлэлцэж байна. Гишүүдийн үг хэлж, асуулт асуусныг хүргэж байна.

М.Оюунчимэг: Хууль хүчний байгууллага хараат бус бие даасан байх тухай олон жил ярьж байна. Шинэ хууль гаргаад л байдаг. Гэтэл амьдрал дээр давтагдаад л яваад байна. АТГ-ын дарга нь дэд даргаа томилдог байх асуудлыг оруулж ирж байна.

Үнэхээр З.Дашдаваа дарга хараат бус байдлыг хангаад авлигыг эсэргүүцэн соён гэгээрүүлэх ажлыг нэг зүгт нэг баг болоод хийж чадах уу.

Өнөөдрийн байдлаар дөрвөн ч хурандаагийн нэр яригдаж байна. Тэр хүнийг тэр зүтгүүлж байна гэж яригдаад байна. Эргээд энэ хүндээ гай болоод дарга нар хүн чихээд нөгөө л хоёр тийшээ хараад суучихдаг байдал давтагдахгүй гэх баталгаа байна уу. Үнэхээр хараат бус байдлаа хангаад хүнээ томилоод ажиллаад явбал гайхамшиг. Хоёр гараа өргөөд дэмжээд явахаас өөр яах билээ.

Нөгөө талаас АТГ-ын дарга, дэд дарга хүссэн хүсээгүй сонгуулийн үр дүнгээс шалтгаалдаг. Ялсан нам өөрийнхөө хүнийг тавих гээд зүтгүүлдэг асуудал үргэлжилж байна. Гэтэл тэнд нь олон жил ажилласан комиссарууд нь байдаг. Тэднийгээ мохоогоод явчихдаг.

Авлига авсан, тэр нь олон түмний нүдэн дээр ил байхад хэрэг нь хаагдчихдаг. Тэгсэн хэрнээ жижиг сажиг хэргээр оролдоод нөгөө дуулиан шуугианыг хаах бохир ажил хууль хүчний байгууллагад байгаад байгааг та хүлээн зөвшөөрөх үү. Үүнийг Хууль зүйн сайдаар ажиллаж байх хугацаандаа шийдэж чадах уу.

Х.Нямбаатар: Хууль шүүхийн байгууллага бусдад дарамт шахалт үзүүлдэг, эд материалыг нь тонон дээрэмддэг асуудлыг халъя гэж бүгд нэгдэж байна. Өнгөрсөн 2012-2016 онд энэ байдал хавтгайрсан. УЕП, ТЕГ, АТГ-ын дарга нь бизнесүүдийг дээрэмддэг байдал гаарсан.

Өөрийнх нь компани дээр татварын акт тавьсны төлөө тагнуулын дарга татварын хэлтсийн даргыг хэдэн жил шоронд явуулсан.

Өөрийнхөө бизнесийн өрсөлдөгчийн цахилгааны шугамыг дэлбэлэх шийдвэр гаргасан зэрэг үлгэр домог шиг асуудал яригддаг. Тиймээс энэ салбарыг хариуцаж байгаа үед энэ гажуудлыг засахын төлөө явна.

А.Сүх