Улстөрчийн замналыг сонгосон бол гоёж гоодох хүслээ өөрөө ч, гэр бүл нь ч дарах хэрэгтэй гэдгийг харж байгаа биз. Бас л улстөрч бол гоншигнолгүй хариуцлага хүлээж сурах хэрэгтэй. Хүний нялх хүүхдийг ингэлээ, тэглээ гэж уйлан дуугарах шаардлага ч байхгүй. Эдийн хүслээ дарж чадаагүй хүмүүс эх орны хөгжлийг тодорхойлох нь юу л бол. Итгэл алдармаар шүү дээ.

Улс төрд орно гэдэг олон зүйлээ ил болгохын нэр. Үр хүүхэд, амраг саданг чинь хүртэл ард түмэн харна гэсэн үг.

Хуруу хумсаа хугалан байж олсон хэдэн төгрөгөө татварт тушаадаг иргэдэд "хүслээ хязгаарлаж чаддаггүй хэдэн гэр бүлийг тэжээх" тэнхэл байхгүй.

Улстөрчдийн үр хүүхэд ч биеэ зөв авч явж, ухаалаг манлайллыг үзүүлэх ёстой. Энэ нь төсвөөс цалинждаг эцэг\эхийнхээ мөнгөөр хангалуун амьдарч байгаагаа гайхуулах, эдийн мансууралд автах биш л дээ.  

"Эрдэмтэй хүн даруу, их мөрөн дөлгөөн" гэж зүйр үгийг мэднэ биз ээ. Гэвч манайд ганганы туйлууд л байна. Аливаа брэндийн шошготой хувцсаараа биш хийж бүтээснээрээ манлайлж, бодлого уралдуулах хэрэгтэй сэн. Мэдлэг боловсролтой хүмүүс нь төр түшилцэж, түмний итгэлийг хүлээдэг тийм монголын цаг хэзээ вэ...