Дэлхий нийтэд цар тахал бий болоод нэг жил, дотоодод халдварлаад хоёр сар гаруйн хугацаа өнгөрч байна. Дотоодод халдвар тархсанаас эмч нар 24 цагаар халдварын голомтод ажиллаж гэр бүл, үр хүүхдээ умартан өвчтөнийнхөө эрүүл энхийг төлөө ажиллаж байна.
Харин цагдаа, онцгойгийнхны хувьд 24 цагаар жижүүрлэн ажиллаж, зарим нь найм найман цагаар ээлжлэн хүйтэн жаварт хайрагдан эргүүлийн үүрэг гүйцэтгэж байна.
Сүүлийн үед ГССҮТ-д хөлдсөн, хайрагдсан цагдаа, сонсогч нар их очиж байгаа талаар мэдээлэл гараад буй. Үүнтэй холбогдуулан Цагдаагийн ерөнхий газраас ГССҮТ-д одоогоор хөлдсөн, хайрагдсан шинжтэй цагдаа очоогүй. Харин хэд хэдэн сонсогч нар очсон гэсэн тайлбар гаргасан байна лээ.
Хүн байтугай адгуус амьтан ч тэрчигнэж буй өвлийн хүйтэн жаварт гадаа найман цаг битгий хэл 80 минут ч үүрэг гүйцэтгэх бэрх. Дээр нь өмнөх жилүүдтэй харьцуулахад хамаагүй хүйтэн өвөл болж байгааг хэлэх үү. Амьтай бүхэн тэсэхэд бэрх л байна.
Гэвч даарч, хөрч байгаа талаар яриа өгсөн сонсогч нарт удирдлагууд нь хэвлэл, мэдээллийн хэрэгсэлд зөвшөөрөлгүй яриа өгөхийг хориглосон мэдэгдэл өгсөн гэх.
Яахав цэрэг хүчний байгууллага гэдэг утгаар тэгэх нь зөв л байх. Гэхдээ Цагдаагийн ерөнхий газраас нь гаргасан тайлбар зэргийг нь харахад ч тэр тэд чинь хүн биш оюутан гэдэг хошин шог шиг л сонсогдоод байна.
Олон цагаар хүйтэн жаварт хайрагдан зогсож байгаа учраас алс хэтдээ тэдний эрүүл мэндэд ч сөргөөр нөлөөлөх нь гарцаагүй.
Хөл хорионы үеэр бүх нийтийн бэлэн байдлыг хангуулахаар цагдаа болон Дотоод хэргийн их сургуулийнхныг дайчилж байгаа талаар дээр дурдсан. Хоёр сар гаруйн хугацаанд тэдэнд нэг удаагийн мөнгөн тусламж болгож онцгой нөхцөлд үүрэг гүйцэтгэж байгаа цагдаа нарт 800 мянган төгрөг, сонсогч нарт хөдөлмөрийн хөлсний доод хэмжээгээр олгосон. Тэдэнд мөнгөн урамшуулал, сэтгэлийн дэм чухал ч ажиллах нөхцөлийг сайжруулах нь өнөөгийн тулгамдсан асуудал яах аргагүй мөн болоод байна. Манайх шиг цагдаа нь сонсогчтойгоо нийлээд олон цагаар бээрч хөрсөн ч ажил үүргээ тасралтгүй биелүүлсээр байдаг өөр улсын цагдаа, сонсогч нар хэд бол.
Б.Лхам
