“Бээжин-2022” олимпын наадамд оролцох баг тамирчдын хувцасыг “Мишел Амазонка” брэнд загварыг нь гарган, үйлдвэрлэж байгаа. Гэсэн ч өнөөдөр сошиал орчинд тамирчдын өмсөх ноосон цамцны энгэр дээрх улсын нэр нь MONCOLIA гэж уншигдахаар байсан нь олны дургуйцлийг нэлээд хүргээд буй. Энэ талаар тодруулахаар “Мишел Амазонка” брэндийн менежер Б.Мөнхбаяртай утсаар холбогдлоо.

-Сайн байна уу, өвлийн олимпод оролцох баг тамирчдын хувцасны талаар тодруулах гэсэн юм?

-За, олон газраас холбогдож байна. Тайлбар өгөөд л байж байна.

-Олимпод оролцох баг тамирчдын хувцас дээрх улсын нэр буруу бичигдсэн талаар та тайлбар хэлэх үү?

-Энэ бол симпол загвар байсан. Ноосон цамц нэхэх технологи өөрөө их олон шат дамжлагатай. Яг эцсийн бүтээгдэхүүн гаргахаас өмнө хоёр гурван симпол гаргадаг. Тэгж байж эцсийн кодоо тохируулдаг. Энэ цамц бол тэр симпол загварын нэг нь. “G” үсгийн үзүүр нь дутуу гарсан байсан учир засаад кодыг нь гаргасан гэсэн үг. Маргааш олимпын баг тамирчдадаа хувцасыг нь гардуулна. Тэр хувцаснуудад ийм алдаа байхгүй.

-Энэ цамц нь ямар зориулалтын цамц вэ?

-Олимпын хотхон дотроо өмсөх ноосон цамц байгаа юм. Яг монгол хонины ноосоор нэхсэн цамц.

-Ер нь өвлийн олимпын баг тамирчдын хэчнээн төрлийн хувцсыг танайх үйлдвэрлэж байгаа вэ?

-Арваад нэр төрлийн бүтээгдэхүүн нийлүүлж байгаа. Малгай, куртка, цамц, ороолт, оймс гээд. Маргааш албан ёсны хуудсаараа энэ бүтээгдэхүүнүүдээ танилцуулна.

С.Сүлд