“Хуванцар хог хаягдлын эсрэг дэлхийн өдөр”-ийг тохиолдуулан Монголын хэрэглэгчдийн эрх ашгийг хамгаалах байгууллага мэдээлэл хийлээ. Энэ үеэр Монголын хэрэглэгчдийн эрх ашгийг хамгаалах байгууллагын ерөнхийлөгч Ц.Оюунбаатар мэдээлэл өглөө. “Өнөөдөр олон улсын хэрэглэгчдийн эрх ашгийг хамгаалах өдөр. Жил бүрийн гуравдугаар сарын 15-ны өдрийг НҮБ-аас зарлаад олон жил болж байна. Олон улсын хэрэглэгчдийн байгууллага энэ өдрийг хуванцар хог хаягдлын эсрэг өдөр болгон зарласан. Монголын хэрэглэгчдийн байгууллага, хамтран ажилладаг төрийн бус байгууллага, иргэний нийгэмлэг өнөөдөр жилийнхээ ажлын тайланг Монголын ард түмэнд танилцуулах гэж байна. Монголын хэрэглэгчдийн эрх ашгийг хамгаалах үндэсний холбоо бол хуультай гурван төрийн бус байгууллагын нэг. 1990 онд байгуулагдсан өөрсдийн хөлс хүчээр ажилладаг ийм байгууллага байгаа юм.

Өнгөрсөн 2021 онд хуванцар хог хаягдлын эсрэг дэлхийн жилийн хүрээнд эрчимтэй ажилласан. Тухайлбал, сүүлийн гурван жил хөөцөлдөж,  олон улсын хөрөнгө оруулалтыг татаж, хуванцар хог хаягдлыг боловсруулах үндэсний том үйлдвэртэй болсон. Долдугаар сард үйл ажиллагаагаа явуулж эхэлсэн. Энэ үйлдвэр жилдээ 20-50 мянган тонн хуванцар хог хаягдлыг бүрэн боловсруулах хүчин чадалтай. Гурван жил гаруй гадаадын хөрөнгө оруулагч нартай хамтран ажиллаж гааль, хүнд суртал бүхнийг даван туулж ажиллалаа. Монгол улсын 1,5 сая хавтгай дөрвөлжин талбайд хуванцар хог хаягдал байхгүй ийм улс орон болох зорилтыг тавин ажиллаж байгаа. Хуванцар хог хаягдлын үйлдвэр “TML” үйлдвэрийг улсын хэмжээнд зохион байгуулах ажлыг эхлүүлсэн. Улаанбаатар хотын хуванцар хог хаягдал тэнд очиж байгаа.  Монголын одоогийн тооцоогоор хуванцар хог хаягдал жилдээ 20 мянган тонн бий. Монгол орны байгаль орчныг хамгаалах нь Монгол хүн бүрийн үүрэг. Тиймээс хэрэглэгч та гадаад орчинд хэрэггүй байдлаар битгий хая. Энэ чинь мөнгө болно. Хуванцар хог хаягдлыг “TML” үйлдвэр дээр нэг кг 500 төгрөгөөр худалдаж авна. Аймаг орон нутгаас нийслэл рүү татах боломжийг эрэлхийлж ажиллаж байна” гэв.

Д.Батчулуун