Баянхонгор аймгийн Шинэжинэст, Баян-Өндөр сумын малчид өнөөдөр Уул уурхай, хүнд үйлдвэрийн яамны гадна жагслаа. Сэгс цагаан богд уулын бүсэд орших “ Баянхөндий ” алтны ордыг Канадын хөрөнгө оруулалттай “Эрдэнэ Монгол” ХХК нь зөвшөөрөл авахдаа хэд хэдэн хууль зөрчсөн байж болзошгүй тухай малчид удаа дараа мэдэгдээд байгаа. Иймд хууль бусаар үйл ажиллагаа явуулж байж болзошгүй байгууллагуудыг шалгаж өгөх хүсэлтээ ирүүлсэн. Харин нутгийн иргэд алт олборлох үйл ажиллагаа явуулснаас үүдэж нутгийн хөрс, газар сэндийчиж, байгалиа нөхөн сэргээж чадахгүй, нэн ховор ан амьтан, ургамлын зүйл устахад хүрч байгаа талаар хэлж байна.

Баянхонгор аймгийн Шинэжинэст сумын өндөр настан Дашжир “Бид эх нутагтайгаа нягт холбоотой, бүгд л эх нутгаасаа үүссэн. Хүн ч бай, амьтан ч бай. Эх нутгаа сүйдэлсэн газар нутаг хаашаа чиглэдэг вэ гэдгийг дэлхий нийтээр мэдэж байгаа. Жишээлбэл Өмнөговийн газар нутаг байна. Тэнд ургах ёстой ургамал, амьтан байхгүй болчихдог. Ойр хавийн орон нутаг бүгд шуурганд үдсэн. Манай говийн хөрс маш эмзэг, онцгой газар. Нэг машин явахад л доод хөрсний шороо ил гараад ирнэ, ургамалын үндэс гараад ирдэг. Нэн ховор амьтад тэнд амьдарч байгаа. 2010 онд сүүлийн цагаан богд гэдэг гүрвэлийг судалсан. Одоо ч олон улсад судалгааны ажлууд хийгдэж байна. Энэ амьтадыг хамгаалахгүй бол шахагдсаар урд хилрүү гарах нөхцөл үүсээд байна. Гол зүйл нь газрын хөрс, усыг нөхаж чадахгүйд оршиж байна. Ингэж байгалиа сөнөөж байснаас байгалиараа байвал хойч үед минь хэрэгтэй” гэв.

Т.Мөнхжаргал