Иргэний нийгмийн орон зайд хэвлэл мэдээллийн гүйцэтгэх үүргийн тухай мэдээлэл хийлээ. Иргэний үзэл бодлоо илэрхийлэхтэй холбоотой асуудлын талаар "Глов Интернэшнл" төвийн хуульч Б.Пүрэвсүрэн танилцууллаа. Тэрбээр “Сүүлийн хоёр жилийн хугацаанд судалгаа хийж үзэхэд цар тахлын нөхцөл байдалд холбоотойгоор 223 зөрчил бүртгэгдсэн. Үүнээс 108 нь иргэний мэдэх эрхтэй холбоотой, жагсаал цуглаан хийх эрхийг зөрчсөн 52, үзэл бодлоо илэрхийлэх иргэний эрхийг зөрчсөн 63 тохиолдол байна. Мөн хэвлэл мэдээллийн гүйцэтгэх үүргийн талаар судалгаа хийж үзэхэд цар тахлын үеийн нөхцөл байдалд хэвлэл мэдээллийн байгууллага сурвалжлах үүргээ хангалттай биелүүлээгүй гэсэн мэдээллийг танилцуулж байсан. УИХ-аас өнгөрсөн арванхоёрдугаар сарын 17-нд нийт 127 хууль баталсан. Эдгээр хуулийг батлахдаа олон нийтийг хамруулах, нээлттэй сонсгол явуулах, талуудын төлөөллийн байр суурийг тусгах асуудал орхигдсон. УИХ-ын хаврын чуулган эхэлсэнтэй холбоотойгоор 50 гаруй хуулийг хэлэлцэхээр өргөн мэдүүлсэн. Эдгээр хуулиудад анхаарал татаж буй олон хууль бий. Иргэний нийгмийн орон зай гэдэг нь олон нийтийг хамардаг. Эвлэл холбоо, ТББ зэрэг олон асуудлыг хамардаг учир үр нөлөөтэй. Тиймээс эдгээр хуулийн төслийг хэлэлцэхэд олон талын төлөөллийг хангах, иргэдийг мэдээ мэдээлэлтэй байлгах тал дээр хамтарч ажиллахыг хэвлэл мэдээллийн байгууллагынхнаас хүсэж байна” гэв. 

Д.Батчулуун